ഫറോക്ക്: ഓട്ടുക്കമ്പനി തൊഴിലാളികളുടെ ബോണസ് തര്‍ക്കം പരിഹരിക്കുന്നതിനായി ഡി.എല്‍.ഒ വിളിച്ചു ചേര്‍ത്ത ചര്‍ച്ച പരാജയപ്പെട്ടു. മിനിമം ബോണസ് എന്നതില്‍ കമ്പനി മാനേജ്‌മെന്റ് ഉറച്ചു നിന്നതാണ് പരാജയപ്പെടാന്‍ കാരണം. ഇതോടെ വിഷയം റീജിയനല്‍ ലേബര്‍ ഓഫിസര്‍ക്ക് വിട്ടു പിരിയുകയായിരുന്നു.     വിഷുവിനു 45ശതമാനം ബോണസ് നല്‍കണമെന്നാണ് തൊഴിലാളികളുടെ ആവശ്യം. എന്നാല്‍ മിനിമം ബോണസായ 8.80 ശതമാനത്തില്‍ കമ്പനി മുതലാളിമാര്‍ ഉറച്ചു നില്‍ക്കുകയായിരുന്നു. ഇതാണ് ചര്‍ച്ച വഴിമുട്ടാന്‍ കാരണം. ഓട് നിര്‍മാണത്തിന് ആവശ്യമായ കളിമണ്ണ് ലഭിക്കുന്നില്ലെന്നും ഉല്‍പ്പന്നങ്ങള്‍ക്ക് വിപണി കുറവാണെന്നുമാണ് തൊഴിലാളികള്‍ ആവശ്യപ്പെട്ട ബോണസ് നല്‍കുന്നതിനു മാനേജ്‌മെന്റ് തടസമായി പറയുന്നത്. ഇതോടെ ഡി.എല്‍.ഒ കെ.വി.വിപിന്‍ ലാല്‍ വിഷയം ആര്‍.ജെ.എല്‍.സിക്കു വിടുകയായിരുന്നു. മാനേജ്‌മെന്റ് തൊഴിലാളി പ്രതിനിധികളുമായി ആര്‍.ജെ.എല്‍.സി ഇന്നോ നാളെയോ ചര്‍ച്ച നടത്തും.
    കളിമണ്ണ് ദൗര്‍ലഭ്യതയും ഉല്‍പ്പന്നങ്ങള്‍ വിപണിയില്ലാത്തതിനാലുമാണ് മേഖല കടത്തുപ്രതിസന്ധിയിലേക്കും പോയിക്കൊണ്ടിരിക്കുന്നത്. മിക്ക കമ്പനികളിലും തൊഴിലാളികള്‍ക്ക് ജോലിയില്ലാതായിരിക്കുകയാണ്. ഇത് തൊഴിലാളികളെ കടുത്ത സാമ്പത്തിക ഞെരുക്കത്തിലേക്കാണ് എത്തിച്ചിരിക്കുന്നത്. ഇതേടൊപ്പം  ബോണസ് കൂടി മുടങ്ങിയാല്‍ തൊഴിലാളി കുടുംബങ്ങളുടെ ഇത്തവണത്തെ വിഷു പട്ടിണിയിലാകും.