#അശ്‌റഫ് കൊണ്ടോട്ടി

കൊണ്ടോട്ടി: ലോക വനിതാ ദിനത്തില്‍ കേരളം ഉള്‍പ്പെടെ ഏഴു വിമാനത്താവളങ്ങളില്‍ ഇന്ന് എയര്‍ ഇന്ത്യാ എക്‌സ്പ്രസിന്റെ വിമാനങ്ങള്‍ വനിതകള്‍ നിയന്ത്രിക്കും. കരിപ്പൂര്‍, നെടുമ്പാശ്ശേരി, തിരുവനന്തപുരം, മുംബൈ, ചെന്നൈ, മംഗളൂരു, ഡല്‍ഹി വിമാനത്താവളങ്ങളില്‍നിന്നാണ് മുഴുവന്‍ ജീവനക്കാരെയും വനിതകള്‍ മാത്രമാക്കി വിമാനങ്ങള്‍ പറക്കുന്നത്. കൊച്ചി, ഡല്‍ഹി, മംഗളൂരു, മുംബൈ എന്നീ നാലു വിമാനത്താവളങ്ങളില്‍നിന്ന് ദുബൈയിലേക്കും കരിപ്പൂരില്‍നിന്ന് റാസല്‍ഖൈമ, തിരുവന്തപുരത്തുനിന്ന് മസ്‌കത്ത്, ചെന്നൈയില്‍നിന്ന് സിംഗപ്പൂരിലേക്കുമുള്ള വിമാനങ്ങളാണ് ഇവര്‍ നിയന്ത്രിക്കുക.
വിമാനത്താവളങ്ങളിലും വനിതാ ജീവനക്കാരായിരിക്കും ഈ വിമാനങ്ങള്‍ പുറപ്പെടുന്ന സമയത്തുണ്ടാവുക. വിമാനത്താവള കൗണ്ടറുകളും ഗ്രൗണ്ട് ഹാന്‍ഡ്‌ലിങ് പ്രവൃത്തികളും അവര്‍ നിയന്ത്രിക്കും. ഒരോ വിമാനത്താവളങ്ങളിലും പ്രത്യേകം കേക്ക് മുറിച്ച് വനിതാ ദിനം ആഘോഷമാക്കും. യാത്രക്കാരായ സ്ത്രീകളെയും ചെറിയ കുഞ്ഞുങ്ങളെയും റോസാപൂവ് നല്‍കി സ്വീകരിക്കും.