സ്വന്തം ലേഖകന്‍

കൊണ്ടോട്ടി: ഗള്‍ഫില്‍ നിന്നെത്തുന്നവരില്‍ കൊവിഡ് ലക്ഷണവും രോഗവും സ്ഥിരീകരിക്കുന്നത് വര്‍ധിച്ചതോടെ വിമാനങ്ങളില്‍ യാത്രക്കാരെ കുറക്കുന്നു. 189 യാത്രക്കാരെ ഉള്‍ക്കൊള്ളുന്ന വിമാനങ്ങളില്‍ 150 മുതല്‍ 160 വരെ യാത്രക്കാരെയാണ് സഉദിയില്‍ നിന്നടക്കം എത്തിക്കുന്നത്. കൊവിഡ് 19നെ തുടര്‍ന്ന് ഇന്നലെ കുവൈറ്റില്‍ നിന്നെത്തിയ വിമാനത്തില്‍ 155 പേരും ജിദ്ദയില്‍ നിന്നെത്തിയ വിമാനത്തില്‍ 152 പേരുമാണുണ്ടായിരുന്നത്. വിമാന കമ്പനികള്‍ക്ക് സര്‍വിസ് നഷ്ടമില്ലാത്ത രീതിയില്‍ യാത്രക്കാരെ കുറക്കുകയാണ് ചെയ്യുന്നത്.

കൊവിഡ് 19 രോഗവും രോഗ ലക്ഷണവുമുളളവരെ പ്രത്യേക വിമാനങ്ങളില്‍ നാട്ടിലേക്ക് എത്തിക്കരുതെന്ന് ഇന്ത്യന്‍ എംബസികള്‍ക്ക് കേന്ദ്രത്തിന്റെ പ്രത്യേക നിര്‍ദേശമുണ്ട്. അതിനാല്‍ ഗര്‍ഭണികള്‍, മറ്റു ചികില്‍സയില്‍ കഴിയുന്നവര്‍, കുട്ടികള്‍ തുടങ്ങിയവരെയാണ് ആദ്യവിമാനങ്ങളില്‍ കൊണ്ടുവരുന്നത്. ഇവരേയും കൊവിഡ് പരിശോധന നടത്തിയാണ് നാട്ടിലേക്ക് അയക്കുന്നത്. എന്നാല്‍ ഇവരില്‍ പലര്‍ക്കും ഇവിടെയെത്തിയപ്പോള്‍ രോഗലക്ഷണങ്ങള്‍ കണ്ടെത്തിയിട്ടുണ്ട്. ഗള്‍ഫില്‍ കൊവിഡ് പരിശോധനക്കായി റാപ്പിഡ് ടെസ്റ്റാണ് നടത്തുന്നത്. ഈ പരിശോധനയിലാണ് സംശയുമുളളത്. 

രാജ്യത്ത് ആദ്യഘട്ടത്തില്‍ നടത്തിയിരുന്ന ഈ ടെസ്റ്റ് സംശയത്തെ തുടര്‍ന്ന് നേരത്തെ തന്നെ നിര്‍ത്തിവെച്ചിരിക്കുകയാണ്. ശരീരോശ്മാവ് പരിശോധിച്ചാണ് മിക്ക ഗള്‍ഫ് രാജ്യങ്ങളും യാത്രക്കാരെ കയറ്റി അയക്കുന്നത്.