കോഴിക്കോട്: ചരക്കു ഗതാഗത മേഖലയില്‍ പ്രമുഖരായ ട്രാന്‍സ് എഷ്യന്‍ ഷിപ്പിങ് സര്‍വിസ് കോഴിക്കോട്ടേക്കും സേവനം വ്യാപിപ്പിക്കുന്നു. ചെലവു കുറഞ്ഞതും സുരക്ഷിതവുമായ ചരക്കുകടത്തു മേഖലയായി ഷിപ്പിങ് മാറിയതോടെ കേരളത്തിലെ പ്രമുഖ തുറമുഖങ്ങളെ ബന്ധിപ്പിച്ച് ചരക്കുസേവനം നടത്താനാണ് കമ്പനി തീരുമാനിച്ചിരിക്കുന്നതെന്ന് ബന്ധപ്പെട്ടവര്‍ വാര്‍ത്താസമ്മേളനത്തില്‍ അറിയിച്ചു.
ട്രാന്‍സ് ഏഷ്യയുടെ എം.വി കരുതല്‍ എന്ന കപ്പലാണ് ഇന്നു ബേപ്പൂരില്‍നിന്നും ചരക്കുമായി പുറപ്പെടുന്നത്. രാവിലെ പതിനൊന്നിന് നടക്കുന്ന ചടങ്ങില്‍ ബേപ്പൂരിലെ പുതിയ ക്രെയിന്‍ ഉപയോഗിച്ച് ചരക്കുകയറ്റല്‍ നടത്തും. മഹാരാഷ്ട്രയിലെ ദരംദാര്‍ തുറമുഖവുമായി ബന്ധപ്പെടുത്തിയാണ് ചരക്കു ഗതാഗതം.
95 ശതമാനവും തദ്ദേശീയമായ എം.വി കരുതല്‍ കൊച്ചിയിലാണ് നിര്‍മിച്ചത്. 1,600 മെട്രിക് ടണ്‍ ഭാരം വഹിക്കാന്‍ കഴിയും. നിലവില്‍ ടൈലുകള്‍, സ്റ്റീല്‍ തുടങ്ങിയവയാണ് കേരളത്തിലേക്ക് കൊണ്ടുവരുന്നത്. ഇവിടെനിന്നും ടയര്‍, കയറുല്‍പ്പന്നങ്ങള്‍ തുടങ്ങിയവ കൊണ്ടുപോകും. വാര്‍ത്താസമ്മേളനത്തില്‍ ചെയര്‍മാന്‍ ജോണ്‍സണ്‍ മാത്യു, ഗ്രുപ്പ് ജനറല്‍ മാനേജര്‍ വില്‍സണ്‍ തോമസ് പങ്കെടുത്തു.