മോസ്‌കോ: ബെല്‍ജിയം പേമാരിയില്‍ തുനീഷ്യ കടപുഴകി. സ്പാര്‍ട്ടക് സ്റ്റേഡിയത്തില്‍ തകര്‍ത്ത് പെയ്ത മഴയില്‍ രണ്ടിനെതിരേ അഞ്ചു ഗോളുകള്‍ക്കാണ് ബെല്‍ജിയം തുനീഷ്യയെ തകര്‍ത്തത്. ഇതോടെ ഗ്രൂപ്പ് ജിയില്‍ നിന്ന് തുനീഷ്യ പുറത്തായി. രണ്ട് മത്സരങ്ങള്‍ ജയിച്ച് ബെല്‍ജിയം ആറ് പോയിന്റുമായി പ്രീക്വാര്‍ട്ടറില്‍ പ്രവേശിച്ചു. ആദ്യ മത്സരത്തില്‍ ഇംഗ്ലണ്ടിനോട് പൊരുതിത്തോറ്റ തുനീഷ്യ ബെല്‍ജിയത്തിന് മുന്നില്‍ പാടെ തകര്‍ന്നടിഞ്ഞു.

പിടിച്ചു നില്‍ക്കാന്‍ ശ്രമിച്ചെങ്കിലും ലുക്കാക്കുവിന്റെയും ഹസാര്‍ഡിന്റെയും നേതൃത്വത്തിലുള്ള മുന്നേറ്റനിരക്ക് മുന്നില്‍ അവര്‍ നിസ്സഹായരായി. മത്സരത്തിന്റെ ആറാം മിനുട്ടില്‍ തന്നെ ബെല്‍ജിയം ലീഡെടുത്തു. പന്തുമായി ബോക്‌സിലേക്ക് ഓടിക്കയറിയ ഹസാര്‍ഡിനെ തുനീഷ്യന്‍ പ്രതിരോധം വീഴ്ത്തി. കിക്കെടുത്ത ഹസാര്‍ഡ് അനായാസം പന്ത് വലയിലെത്തിച്ചു. തുടരെ തുടരെ ആക്രമണങ്ങള്‍ നടത്തിയ ബെല്‍ജിയം 16ാം മിനുട്ടില്‍ ലുക്കാക്കുവിലൂടെ വീണ്ടും ഗോള്‍ നേടി. മധ്യത്തില്‍ നിന്ന് മെര്‍ട്ടനസ് നല്‍കിയ പന്തുമായി കുതിച്ച ലുക്കാക്കു ഡിഫന്‍ഡറുടെ കാലിനിടയിലൂടെ പന്ത് വലയിലെത്തിച്ചു. 18ാം മിനുട്ടില്‍ ഡയ്‌ലന്‍ ബ്രോണിലൂടെ തുനീഷ്യ ഒരു ഗോള്‍
മടക്കി തിരിച്ചുവരവ് നടത്തിയെങ്കിലും ആദ്യ പകുതിയുടെ എക്‌സ്ട്രാ ടൈമില്‍ ലുക്കാക്കുവിലൂടെ ബെല്‍ജിയം വീണ്ടും മറുപടി നല്‍കി.
മൂന്ന് ഗോളുകളുടെ ലീഡുമായി കളം വിട്ട ബെല്‍ജിയം രണ്ടാം പകുതിയുടെ തുടക്കത്തില്‍ തന്നെ ഹസാര്‍ഡിലൂടെ വീണ്ടും തുനീഷ്യന്‍വല ചലിപ്പിച്ചു. നാല് ഗോളുകള്‍ വീണതോടെ തുനീഷ്യ ഒന്ന് പതറി. തോല്‍വി ഉറപ്പായതോടെ പ്രതിരോധത്തില്‍ നിന്ന് ആക്രമണത്തിലേക്ക് ചുവടുമാറ്റിയ തുനീഷ്യ ബെല്‍ജിയം ഗോള്‍മുഖത്ത് നിരന്തരം മുന്നേറ്റം നടത്തിയെങ്കിലും ഗോള്‍ മാത്രം അകന്നുനിന്നു. 90ാം മിനുട്ടില്‍ ബെല്‍ജിയത്തിന് വേണ്ടി പകരക്കാരനായെത്തിയ മിച്ചി ബാദുഷായി അഞ്ചാം ഗോള്‍ നേടി. മികച്ച നിരവധി അവസരം പാഴാക്കിക്കളഞ്ഞതിന് ശേഷമാണ് ബാദുഷായി ഗോള്‍ നേടിയത്. 93ാം മിനുട്ടില്‍ വഹാബി ഖസ്‌രിയിലൂടെ തുനീഷ്യ ഒരു ഗോള്‍ കൂടി മടക്കി പരാജയഭാരം കുറച്ചു. മത്സരത്തില്‍ രണ്ടു ഗോളുകള്‍ നേടിയ ലുക്കാക്കു ബെല്‍ജിയത്തിന് വേണ്ടി യൂറോകപ്പിലും ലോകകപ്പിലും ഏറ്റവും കൂടുതല്‍ ഗോള്‍ നേടിയ താരമെന്ന റെക്കോര്‍ഡ് സ്വന്തമാക്കി.