അണ്ടിക്കോട്: ഖുര്‍ആന്‍ പാരായണത്തില്‍ വിസ്മയം തീര്‍ത്ത് ഫാത്വിമ ഹിഫഌല്‍ ഖുര്‍ആന്‍ അക്കാദമിയിലെ വിദ്യാര്‍ഥികള്‍.
12 മണിക്കൂര്‍ കൊണ്ട് ഖുര്‍ആന്‍ മുഴുവന്‍ മന:പാഠം ഓതിയാണ് അണ്ടിക്കോട് ഫാത്വിമ ഹിഫഌല്‍ ഖുര്‍ആന്‍ അക്കാദമിയിലെ വിദ്യാര്‍ഥികളായ ആശിഖ് അലി രാമനാട്ടുകര, സിംസാര്‍ ഷാഹുല്‍ ഹമീദ് ചെമ്മാട്, മുഹമ്മദ് റൈഹാന്‍ അരീക്കോട് എന്നിവര്‍ വിസ്മയമായത്.
രാവിലെ ആറുമുതല്‍ വൈകീട്ട് ആറുവരെയായിരുന്നു പാരായണം. പ്രാഥമികാവശ്യങ്ങള്‍, നിസ്‌കാരം എന്നിവയ്ക്കു മാത്രമാണ് ഇതിനിടയില്‍ വിദ്യാര്‍ഥികള്‍ പാരായണം നിര്‍ത്തിയത്. ഹാഫിളുമാരായ മുഹ്‌സിന്‍, സഫ്‌വാന്‍, ജുനൈദ് എന്നിവരുടെ കീഴിലാണ് ഇവര്‍ പഠനം പൂര്‍ത്തിയാക്കിയത്.
അക്കാദമിയില്‍ നിന്ന് പഠനം പൂര്‍ത്തിയാക്കിയ വിദ്യാര്‍ഥികള്‍ക്കുള്ള സനദ്ദാനം 14ന് സയ്യിദ് ഹൈദരലി ശിഹാബ് തങ്ങള്‍ ഉപഹാരം നല്‍കി അനുമോദിക്കുമെന്ന് ചെയര്‍മാന്‍ അബ്ദുല്ല മുഹമ്മദ് അറിയിച്ചു.