തൃശൂര്‍: വിവിധ ആവശ്യങ്ങള്‍ ഉന്നയിച്ച് സ്‌കൂള്‍ പാചക തൊഴിലാളി യൂണിയന്‍ (എ.ഐ.ടി.യു.സി) യുടെ ആഭിമുഖ്യത്തില്‍ സെക്രട്ടേറിയറ്റിനു മുമ്പില്‍ 101 മണിക്കൂര്‍ കഞ്ഞിവെപ്പ് സമരം നടത്തുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ഏപ്രില്‍ 17 മുതല്‍ 21 വരെ നടത്തുന്ന സമരം എ.ഐ.ടി.യു.സി സംസ്ഥാന ജനറല്‍ സെക്രട്ടറി കെ.പി രാജേന്ദ്രന്‍ ഉദ്ഘാടനം ചെയ്യും. മിനിമം കൂലി വിജ്ഞാപനം മുന്‍കാല പ്രാബല്യത്തോടെ നടപ്പിലാക്കുക, അവകാശ പത്രിക അംഗീകരിക്കുക, ഭവനം ഫൗണ്ടേഷന്‍ കേരള പദ്ധതിയില്‍ ഉള്‍പ്പെടുത്തി ഭവന ആരോഗ്യ സുരക്ഷാ വിദ്യാഭ്യാസ സൗകര്യങ്ങള്‍ ഏര്‍പ്പെടുത്തുക, അവധിക്കാല അലവന്‍സായി പകുതി വേതനവും സൗജന്യ റേഷനും അനുവദിക്കുക തുടങ്ങിയവ നേടിയെടുക്കുന്നതിനാണ് സമരം.
സംസ്ഥാനത്തെ 30,000ത്തില്‍ പരം വരുന്ന സ്‌കൂള്‍ പാചകത്തൊഴിലാളികളില്‍ മൂന്നിലൊന്നും സര്‍ക്കാര്‍ രേഖകളിലോ കണക്കുകളിലോ ഉള്‍പ്പെട്ടിട്ടില്ലെന്ന് ഭാരവാഹികള്‍ പറഞ്ഞു. മൂന്ന് മാസത്തോളമായി തൊഴിലാളികള്‍ക്ക് വേതനം ലഭിക്കാത്ത സ്ഥിതിയാണ്. ഇ.എസ്.ഐ, മറ്റ് ചികിത്സാ ആനുകൂല്യങ്ങള്‍, പി.എഫ്, തൊഴില്‍ നിയമങ്ങളുടെ പരിരക്ഷ, ഗ്രാറ്റിവിറ്റി, പെന്‍ഷന്‍, റിട്ടയര്‍മെന്റ് ആനുകൂല്യങ്ങള്‍ എന്നിവയൊന്നും ഇവര്‍ക്ക് കിട്ടുന്നില്ല.
അഞ്ഞൂറ് കുട്ടികള്‍ക്ക് ഭക്ഷണം പാകം ചെയ്തു നല്‍കാന്‍ ഒരു തൊഴിലാളി എന്ന കണക്കിനാണ് സര്‍ക്കാര്‍ അംഗീകരിച്ചിട്ടുള്ളത്. യൂണിന്റെ നിരന്തര ശ്രമങ്ങള്‍ക്കൊടുവില്‍ മിനിമം കൂലി നിശ്ചയിച്ചു വിജ്ഞാപനമായെങ്കിലും ഇത് നടപ്പിലാക്കാന്‍ വിദ്യാഭ്യാസ വകുപ്പ് താല്‍പര്യമെടുത്തില്ല. ഇതുമൂലം നിലവിലെ തൊഴില്‍ വ്യവസ്ഥകളും നിയമ പരിരക്ഷയും പാചകത്തൊഴിലാളികള്‍ക്ക് അന്യമാണ്. ബന്ധപ്പെട്ട അധികൃതര്‍ക്കെല്ലാം നല്‍കിയ നിവേദനങ്ങളും നടത്തിയ സമരങ്ങളും അവഗണിക്കപ്പെട്ട പശ്ചാത്തലത്തിലാണ് കഞ്ഞിവെപ്പ് സമരത്തിന് നിര്‍ബന്ധിതമായത്. വിവിധ സംഘടനകളുടെ നേതാക്കളും ജനപ്രതിനിധികളും വിവിധ ദിവസങ്ങളിലായി സമരത്തെ അഭിവാദ്യം ചെയ്യും. വാര്‍ത്താ സമ്മേളനത്തില്‍ സംസ്ഥാന ജനറല്‍ സെക്രട്ടറി പി ജി മോഹനന്‍, ജില്ലാ സെക്രട്ടറി വി കെ ലതിക, പ്രസിഡന്റ് സി യു ശാന്ത, ജോയിന്റ് സെക്രട്ടറി രതീഷ് ചാഴൂര്‍ എന്നിവര്‍ സന്നിഹിതരായിരുന്നു.