ന്യൂഡല്‍ഹി: ലോക്‌സഭാ തെരഞ്ഞെടുപ്പ് തന്ത്രങ്ങള്‍ക്ക് ഇന്നലെ ഗുജറാത്തില്‍ ചേര്‍ന്ന കോണ്‍ഗ്രസ് പ്രവര്‍ത്തക സമിതി അന്തിമ രൂപം നല്‍കി. ലോക്‌സഭ തെരഞ്ഞെടുപ്പിനെ നേരിടാനൊരുങ്ങുന്ന പാര്‍ട്ടി, ഓരോ സംസ്ഥാനത്തും കൈക്കൊള്ളേണ്ട നയതീരുമാനങ്ങള്‍, സ്ഥാനാര്‍ഥിനിര്‍ണയം, പ്രചാരണപരിപാടികള്‍, സഖ്യനീക്കങ്ങള്‍ തുടങ്ങിയവ ചര്‍ച്ചചെയ്തു.

രാജ്യത്തെ അലട്ടുന്ന വിവിധ വിഷയങ്ങളില്‍ പ്രധാനമന്ത്രി നരേന്ദ്ര മോദി ഉത്തരം പറയണമെന്ന ആവശ്യം പ്രവര്‍ത്തക സമിതി മുന്നോട്ടുവച്ചു. മഹാത്മാഗാന്ധി 1930ല്‍ നടത്തിയ ദണ്ഡിയാത്രയുടെ വാര്‍ഷിക ദിനമെന്നനിലയ്ക്കാണ് പ്രവര്‍ത്തക സമിതി അഹമ്മദാബാദില്‍ നടന്നത്. സബര്‍മതി ഗാന്ധി ആശ്രമത്തില്‍ പ്രാര്‍ഥനാ യോഗത്തോടെയായിരുന്നു തുടക്കം. സര്‍ദാര്‍ വല്ലഭ്ഭായി പട്ടേല്‍ ദേശീയ സ്മാരകത്തിലാണ് പ്രവര്‍ത്തക സമിതി യോഗം ചേര്‍ന്നത്. 1961ന് ശേഷം ആദ്യമായാണ് ഗുജറാത്തില്‍ കോണ്‍ഗ്രസ് പ്രവത്തകസമിതി ചേരുന്നതെന്ന പ്രത്യേകതയും ഇന്നലത്തെ യോഗത്തിനുണ്ട്.

ലോക്‌സഭാ തിരഞ്ഞെടുപ്പ് അടുത്തിരിക്കേ, ബി.ജെ.പിയുടെ കോട്ടയില്‍ കോണ്‍ഗ്രസ് പ്രവത്തകസമിതിയോഗത്തിന് രാഷ്ട്രീയപ്രധാന്യമേറെയാണ്. കോണ്‍ഗ്രസ് അധ്യക്ഷന്‍ രാഹുല്‍ഗാന്ധി, യു.പി.എ അധ്യക്ഷ സോണിയ ഗാന്ധി, മുന്‍ പ്രധാനമന്ത്രി ഡോ. മന്‍മോഹന്‍ സിങ്, എ.ഐ.സി.സി ജന. സെക്രട്ടറി പ്രിയങ്ക ഗാന്ധി എന്നിവര്‍ക്കു പുറമെ കേരളത്തില്‍നിന്നുള്ള പ്രവര്‍ത്തക സമിതി അംഗങ്ങളായ എ.കെ ആന്റണി, ഉമ്മന്‍ ചാണ്ടി, കെ.സി വേണുഗോപാല്‍, പി.സി ചാക്കോ എന്നിവരും യോഗത്തില്‍ പങ്കെടുത്തു.

യോഗ ശേഷം ഗാന്ധിനഗറില്‍ കോണ്‍ഗ്രസിന്റെ ഉജ്വല തെരഞ്ഞെടുപ്പ് റാലിയും നടന്നു. യോഗത്തില്‍ സംസാരിച്ച രാഹുല്‍ഗാന്ധി അതിനിശിതമയാണ് കേന്ദ്രസര്‍ക്കാരിനെയും പ്രധാനമന്ത്രി നരേന്ദ്രമോദിയെയും വിമര്‍ശിച്ചത്. എ.ഐ.സി.സി ജനറല്‍ സെക്രട്ടറിയെന്ന നിലയ്ക്ക് പ്രിയങ്കാ ഗാന്ധി ആദ്യമായി പാര്‍ട്ടി പൊതുയോഗത്തെ അഭിസംബോധന ചെയ്ത് സംസാരിച്ചു. പ്രസംഗത്തിലുടനീളം പ്രധാനമന്ത്രി നരേന്ദ്ര മോദിയേയും കേന്ദ്ര സര്‍ക്കാരിനേയും പ്രിയങ്ക രൂക്ഷമായി വിമര്‍ശിച്ചു.