പാലക്കാട്: ഒറ്റപ്പാലത്ത് നടന്ന കെ. പി. സി. സി.യുടെ പ്രഥമ സമ്മേളനത്തിന്റെ 96-ാം വാര്‍ഷികത്തിന് അയ്യായിരം പേരുടെ പൊതുസമ്മേളനം നടത്തുവാന്‍ ജില്ലയിലെ മണ്ഡലം പ്രസിഡന്റുമാരുടെ യോഗം തീരുമാനിച്ചു.
23ന് ഒറ്റപ്പാലം മനിശ്ശീരി കെ. എം ഓഡിറ്റോറിയത്തില്‍ വച്ചാണ് ഉദ്ഘാടന സമ്മേളനം. 24ന് യുവജന-വിദ്യാര്‍ഥി സമ്മേളനം, ദലിത്-ന്യൂനപക്ഷ സമ്മേളനം, 25ന് തൊഴിലാളി സംഗമം, വനിതാ സമ്മേളനം എന്നിവ നടക്കും. 26ന് വൈകീട്ട് നാല് മണിക്ക് ഒറ്റപ്പാലം ബസ് സ്റ്റാന്റ് മൈതാനത്താണ് പൊതുസമ്മേളനം. ദേശിയ-സംസ്ഥാന നേതാക്കള്‍ നാല് ദിവസമായി നടക്കുന്ന സമ്മേളനത്തില്‍ പങ്കെടുക്കും. സ്വാതന്ത്ര്യ സമര ചരിത്ര ഫോട്ടോ പ്രദര്‍ശനം, സിനിമാ പ്രദര്‍ശനം, സാംസ്‌കാരിക പരിപാടികള്‍ എന്നിവ ഉണ്ടായിരിക്കും.
മണ്ഡലം പ്രസിഡന്റുമാരുടെ യോഗം  മുന്‍ എം. പി.  വി. എസ്. വിജയരാഘവന്‍ ഉദ്ഘാടനം ചെയ്തു. ഡി. സി. സി. പ്രസിഡന്റ് വി. കെ. ശ്രീകണ്ഠന്‍ അധ്യക്ഷനായി.കെ. പി. സി. സി. നിര്‍വാഹക സമിതി അംഗങ്ങളായ പി. ഹരിഗോവിന്ദന്‍, സി. ടി. സെയ്തലവി, യു. ഡി. എഫ്. ചെയര്‍മാന്‍ എ. രാമസ്വാമി, കെ. എസ്. ബി. എ തങ്ങള്‍, പി. വി രാജേഷ്, വി. രാമചന്ദ്രന്‍, പ്രകാശ് കാഴ്ച്ചപറമ്പില്‍ സംസാരിച്ചു.