കോഴിക്കോട്: രാഹുല്‍ ഗാന്ധിയുടെ കേരളത്തിലെ തെരഞ്ഞെടുപ്പ് പര്യടനത്തിനു തുടക്കംകുറിക്കുന്ന ജനമഹാറാലി നാളെ കോഴിക്കോട്.

കോഴിക്കോട് ബീച്ചില്‍ വൈകിട്ട് നാലിന് നടക്കുന്ന റാലി സംസ്ഥാനത്തെ യു.ഡി.എഫിന്റെ ലോക്‌സഭാ തെരഞ്ഞെടുപ്പ് പ്രചാരണങ്ങളുടെ തുടക്കമാകുമെന്ന് ഡി.സി.സി പ്രസിഡന്റ് ടി. സിദ്ദിഖ് വാര്‍ത്താസമ്മേളനത്തില്‍ അറിയിച്ചു.
പ്രവര്‍ത്തകസമിതി അംഗം എ.കെ ആന്റണി, എ.ഐ.സി.സി ജനറല്‍ സെക്രട്ടറി മുകുള്‍ വാസ്‌നിക്, ഉമ്മന്‍ ചാണ്ടി, കെ.സി വേണുഗോപാല്‍, കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍, പ്രതിപക്ഷനേതാവ് രമേശ് ചെന്നിത്തല തുടങ്ങിയവര്‍ സംബന്ധിക്കും.

കടപ്പുറത്തു നടക്കുന്ന റാലിയില്‍ ഒരു ലക്ഷം പ്രവര്‍ത്തകര്‍ പങ്കെടുക്കുമെന്നും അദ്ദേഹം പറഞ്ഞു. 14ന് രാവിലെ രാഹുല്‍ ഗാന്ധി കൊല്ലപ്പെട്ട കാസര്‍കോട് കല്ല്യോട്ടെ യൂത്ത് കോണ്‍ഗ്രസ് പ്രവര്‍ത്തകരുടെ വീടും കണ്ണൂര്‍ എടയന്നൂരില്‍ കൊല്ലപ്പെട്ട യൂത്ത് കോണ്‍ഗ്രസ് നേതാവ് ശുഹൈബിന്റെ വീടും സന്ദര്‍ശിച്ച ശേഷം കണ്ണൂര്‍ വിമാനത്താവളത്തില്‍ നിന്ന് ഹെലികോപ്റ്റര്‍ വഴി 3.30ന് കരിപ്പൂരിലെത്തും. അവിടെനിന്ന് കാര്‍ മാര്‍ഗം കോഴിക്കോട്ടെത്തും. ബീച്ചിലെ ജനമഹാറാലിക്കു ശേഷം 6.30ഓടെ കരിപ്പൂരില്‍ നിന്ന് ഡല്‍ഹിക്കു തിരിക്കും.