ജിദ്ദ: ആസന്നമായ ലോക്‌സഭാ തെരഞ്ഞെടുപ്പില്‍ പൊന്നാനിയില്‍ മത്സരിക്കുന്ന യു.ഡി.ഫ് സ്ഥാനാര്‍ഥിയായ മുസ്‌ലിം ലീഗ് നേതാവ് ഇ.ടി മുഹമ്മദ് ബഷീര്‍ സാഹിബ് ഉജ്ജ്വല വിജയം നേടുമെന്ന് മുസ്‌ലിം ലീഗ് സംസ്ഥാന സെക്രട്ടറിയും കോട്ടക്കല്‍ മണ്ഡലം എം.എല്‍.എയുമായ പ്രൊഫ. സയ്യിദ് ആബിദ് ഹുസൈന്‍ തങ്ങള്‍ പറഞ്ഞു. യു.ഡി.എഫ് പ്രവര്‍ത്തകര്‍ ഒരുമയോടെ പ്രവര്‍ത്തിക്കുന്നതിനാല്‍ ഇത്തവണ പൊന്നാനിയില്‍ ഭൂരിപക്ഷം വര്‍ധിക്കുമെന്നും അദ്ദേഹം പറഞ്ഞു.

ജിദ്ദ കോട്ടക്കല്‍ മണ്ഡലം കെ.എം.സി.സി സംഘടിപ്പിച്ച 'ലോക്‌സഭാ തെരഞ്ഞെടുപ്പ് മുന്നൊരുക്കവും മുസ്‌ലിം ലീഗ് സ്ഥാപക ദിനാചരണവും' പരിപാടിയില്‍ പങ്കെടുത്ത് സംസാരിക്കുകയായിരുന്നു അദ്ദേഹം. കേരളത്തില്‍ യു.ഡി.എഫ് സ്ഥാനാര്‍ത്ഥികളെ വിജയിപ്പിക്കാന്‍ പ്രവാസികള്‍ കഴിയുന്നതെല്ലാം ചെയ്യണമെന്ന് അദ്ദേഹം അഭ്യര്‍ത്ഥിച്ചു. ഇന്ത്യാ രാജ്യത്ത് മതേതരത്വവും ജനാധിപത്യവും നിലനിര്‍ത്താന്‍ തെരെഞ്ഞെടുപ്പില്‍ കോണ്‍ഗ്രസിന് പരമാവധി സീറ്റ് ലഭിക്കേണ്ടതുണ്ടെന്നും അദ്ദേഹം കൂട്ടിച്ചേര്‍ത്തു.

ഷറഫിയ്യ ഷിഫാ ജിദ്ദ ക്ലിനിക് ഓഡിറ്റോറിയത്തില്‍ വെച്ച് നടന്ന പരിപാടി കെ.എം.സി.സി സഊദി നാഷണല്‍ കമ്മിറ്റി പ്രസിഡന്റ് കെ.പി മുഹമ്മദ് കുട്ടി ഉദ്ഘാടനം ചെയ്തു. കോട്ടക്കല്‍ മണ്ഡലം കെ.എം.സി.സി പ്രസിഡന്റ് കെ.എം മൂസ ഹാജി കോട്ടക്കല്‍ അധ്യക്ഷത വഹിച്ചു. മുസ്‌ലിം ലീഗ് സംസ്ഥാന സെക്രെട്ടറി അബ്ദുറഹ്മാന്‍ കല്ലായി മുഖ്യ പ്രഭാഷണം നടത്തി.

കെ.എം.സി.സി നാഷണല്‍ കമ്മിറ്റി ജനറല്‍ സെക്രട്ടറി ഖാദര്‍ ചെങ്കള, ജിദ്ദ സെന്‍ട്രല്‍ കമ്മിറ്റി ജനറല്‍ സെക്രട്ടറി അബൂബക്കര്‍ അരിമ്പ്ര, വൈസ് പ്രസിഡന്റ് വി.പി മുസ്തഫ, നിസാം മമ്പാട്, ഇസ്മായില്‍ മുണ്ടക്കുളം ടി.എം.എ റഊഫ് , മലപ്പുറം ജില്ലാ കെ.എം.സി.സി ആക്ടിങ് പ്രസിഡന്റ് വി.പി. ഉനൈസ്, നാസര്‍ കാടാമ്പുഴ, മജീദ് കോട്ടീരി, നാസര്‍ ഒളവട്ടൂര്‍ തുടങ്ങിയവര്‍ പ്രസംഗിച്ചു.

മലപ്പുറം ജില്ലാ കെ.എം.സി.സി കുടുംബ സുരക്ഷാ പദ്ധതിയുടെ കോട്ടക്കല്‍ മണ്ഡലം തല ഉദ്ഘാടനം ചെയര്‍മാന്‍ അബ്ദുലത്തീഫ് ചാപ്പനങ്ങാടിക്ക് അപേക്ഷ ഫോറം നല്‍കി ആബിദ് ഹുസൈന്‍ തങ്ങള്‍ എം.എല്‍.എ നിര്‍വഹിച്ചു.

മാറാക്കര സി.എച്ച് സെന്റററിനുള്ള സംഭാവന മുകേഷ് പാങ്ങാട്ട് ആബിദ് ഹുസൈന്‍ തങ്ങള്‍ എം.എല്‍.എക്കു കൈമാറി. മുഹമ്മദ് കല്ലിങ്ങല്‍ ഖിറാഅത് നടത്തി. ജനറല്‍ സെക്രട്ടറി നാണി ഇസ്ഹാഖ് മാസ്റ്റര്‍ സ്വാഗതവും ട്രഷറര്‍ ഇബ്രാഹിം ഹാജി വളാഞ്ചേരി നന്ദിയും പറഞ്ഞു.

അന്‍വര്‍ സാദത് കുറ്റിപ്പുറം, മുഹമ്മദലി എരണിയന്‍, റസാഖ് വെണ്ടല്ലൂര്‍, അന്‍വര്‍ പൂവ്വല്ലൂര്‍, ടി.ടി ഷാജഹാന്‍, പി.പി മൊയ്തീന്‍ എടയൂര്‍, മുജീബ് നെയ്യത്തൂര്‍, സൈനു കോടഞ്ചേരി, ഹംദാന്‍ ബാബു, സമദലി, ആബിദ് തയ്യില്‍ തുടങ്ങിയവര്‍ പരിപാടിക്ക് നേതൃത്വം നല്‍കി.