ചേര്‍ത്തല: ചേര്‍ത്തല ഒറ്റപ്പുന്ന, കെ.എസ്.ഇ.ബി. സബ്ബ്‌സ്റ്റേഷന് തെക്കുവശം റോഡരികില്‍ നിര്‍ത്തിയിട്ടിരുന്ന സ്വകാര്യബസ് തീ കത്തി നശിച്ചു.
തണ്ണീര്‍മുക്കം കരിക്കാട് മമ്പോഴിയില്‍ രതീഷിന്റെ കൊച്ചുകാവിലമ്മ എന്ന ബസാണ് കത്തി നശിച്ചത്. തിങ്കളാഴ്ച പുലര്‍ച്ചെ മൂന്നരയോടെയാണ് ബസിന് തീപിടിക്കുന്നത് പരിസരവാസികള്‍ കണ്ടത്.
വിവരം അറിയിച്ചതനുസരിച്ച് ചേര്‍ത്തലയില്‍ നിന്നുംഅഗ്‌നിശമന സേനയുടെ രണ്ട് യൂണിറ്റ് എത്തിയാണ് തീയണച്ചത്.
പ്രദേശവാസികളും ഓടിയെത്തി തീയണക്കാന്‍ സഹായിച്ചു. എന്നാലും ബസ് ഏതാണ്ട് പൂര്‍ണ്ണമായും കത്തി നശിച്ചു. ടാങ്കില്‍ നിറച്ച് ഡീസലുണ്ടായിരുന്നെങ്കിലും ടാങ്കിലേക്ക് തീ പടരാതിരുന്നതിനാല്‍ വന്‍ദുരന്തം ഒഴിവായി.
ചേര്‍ത്തല അഴീക്കല്‍ റൂട്ടില്‍ സര്‍വിസ് നടത്തുന്ന ബസ്, സര്‍വിസ് അവസാനിപ്പിച്ച ശേഷം ഞായറാഴ്ച വൈകിട്ട് ഏഴോടെയാണ് ഇവിടെ പാര്‍ക്ക് ചെയ്തത്. രതീഷിന്റെ ഭാര്യവീട് ഇതിനടുത്താണ്.
രാത്രിയില്‍ സ്ഥിരമായി ബസ് ഇവിടെയാണ് പാര്‍ക്ക് ചെയ്യുന്നത്. തീ പിടുത്തത്തിന്റെ കാരണം വ്യക്തമല്ല. ഫോറന്‍സിക് വിദഗ്ദര്‍ സ്ഥലത്തെത്തി തെളിവുകള്‍ ശേഖരിച്ചിട്ടുണ്ട്. പട്ടണക്കാട് പൊലിസ് അന്വേഷണം ആരംഭിച്ചു.