കുറ്റിപ്പുറം: ആന്ധ്രയില്‍ നിന്നെത്തിച്ച 25 കിലോ കഞ്ചാവുമായി കുറ്റിപ്പുറത്ത് മൂന്ന് പേര്‍ പിടിയിലായി. ഒതുക്കുങ്ങല്‍ വലിയപറമ്പ് സ്വദേശി കിഴക്കേപറമ്പത്ത് അനീസ് മോന്‍ (22), കോട്ടക്കല്‍ ഇന്ത്യനൂര്‍ സ്വദേശി ചെരട മുഹമ്മദ് റിഷാദ് (21), ഒതുക്കുങ്ങല്‍ ആട്ടിരി സ്വദേശി കരിപ്പായി അബ്ദുല്‍ മജീദ് (24) എന്നിവരാണ് കഞ്ചാവ് പൊതികളുമായി എക്‌സൈസ് സംഘത്തിന്റെ പിടിയിലായത്.
കുറ്റിപ്പുറം എക്‌സൈസ് ഇന്‍സ്‌പെക്ടര്‍ ജിജി പോളിന്റെ നേതൃത്വത്തിലുള്ള സംഘമാണ് ഇന്നലെ രാവിലെ കുറ്റിപ്പുറം ഹൈവേ മേല്‍പ്പാലത്തിന് താഴെ ഭാഗത്ത് വച്ച് ഓട്ടോയില്‍ കഞ്ചാവ് കടത്തുന്നതിനിടെ സംഘത്തെ പിടികൂടിയത്. കഞ്ചാവ് മൊത്തവിതരണ സംഘത്തിലെ കണ്ണികളാണിവരെന്ന് എക്‌സൈസ് അധികൃതര്‍ പറഞ്ഞു.
ആന്ധ്രാപ്രദേശിലെ തുനിയില്‍ നിന്നും ട്രെയിന്‍ മാര്‍ഗമാണ് ഇവര്‍ കുറ്റിപ്പുറത്ത് കഞ്ചാവ് എത്തിച്ചത്. ഇവിടെ നിന്നും ഓട്ടോറിക്ഷയില്‍ കടത്തി കൊണ്ടു പോകുന്നതിനിടയിലാണ് സംഘം പിടിക്കപ്പെടുന്നത്. ഓട്ടോറിക്ഷയും എക്‌സൈസ് സംഘം കസ്റ്റഡിയിലെടുത്തിട്ടുണ്ട്. പ്രതികളില്‍നിന്ന് 28,000 രൂപയും നാല് മൊബൈല്‍ ഫോണുകളും പിടിച്ചെടുത്തു. പിടിയിലായ മുഹമ്മദ് റിഷാദ് നിരവധി മയക്കുമരുന്ന് കേസുകളിലെ പ്രതിയാണ്. ആന്ധ്രയില്‍നിന്നും എത്തിക്കുന്ന കഞ്ചാവ് കോട്ടക്കല്‍, പുത്തനത്താണി ഭാഗങ്ങളിലാണ് വിറ്റഴിക്കുന്നത്. വിദ്യാര്‍ഥികളെ കേന്ദ്രീകരിച്ചാണ് വില്‍പനകള്‍ ഏറെയും നടക്കുന്നത്. മാസത്തില്‍ ആന്ധ്രയില്‍നിന്നും 100 കിലോ കഞ്ചാവ് വരെ കടത്തിക്കൊണ്ടു വരുന്നതായി ചോദ്യം ചെയ്യലില്‍ പ്രതികള്‍ സമ്മതിച്ചിട്ടുണ്ട്.
പ്രതികളുടെ മൊബൈലില്‍നിന്നും ലഭിച്ച വിവരങ്ങളുടെ അടിസ്ഥാനത്തില്‍ സംഘത്തിലെ കൂടുതല്‍ ആളുകളെക്കുറിച്ചുള്ള സൂചനകള്‍ കിട്ടിയതായി എക്‌സൈസ് സംഘം പറഞ്ഞു.