ന്യൂഡല്‍ഹി: തൃശൂര്‍ പൂരം വെടിക്കെട്ടിന് സുപ്രിംകോടതി ഏര്‍പ്പെടുത്തിയ നിയന്ത്രണം നീക്കണമെന്നാവശ്യപ്പെട്ട് തിരുവമ്പാടി, പാറമേക്കാവ് ദേവസ്വം ബോര്‍ഡുകള്‍ സുപ്രിംകോടതിയെ സമീപിച്ചു.
കഴിഞ്ഞ ഒക്ടോബറിലെ വിധിയില്‍ ഭേദഗതിയും ഇളവും ആവശ്യപ്പെട്ടാണ് ഹരജി സമര്‍പ്പിച്ചത്. കൂടിയ ശബ്ദമുണ്ടാക്കുന്ന പടക്കങ്ങള്‍ ഉപയോഗിക്കാന്‍ അനുമതി വേണമെന്നും സമയനിയന്ത്രണത്തില്‍ ഇളവ് വേണമെന്നും ഹരജിയില്‍ ആവശ്യപ്പെടുന്നു. ഈ മാസം 27ന് ജസ്റ്റിസ് എസ്.എ. ബോബ്‌ഡെ അധ്യക്ഷനായ ബെഞ്ച് ഹരജി പരിഗണിക്കും.
പൂരങ്ങള്‍, ദീപാവലി ഉള്‍പ്പെടെയുള്ള ആഘോഷങ്ങള്‍ക്ക് പടക്കങ്ങള്‍ ഉപയോഗിക്കുന്നതിന് നിയന്ത്രണമേര്‍പ്പെടുത്തിയാണ് ഒക്ടോബറില്‍ സുപ്രിംകോടതി ഉത്തരവ് പുറപ്പെടുവിച്ചത്.
ദീപാവലി ആഘോഷങ്ങള്‍ക്ക് രാത്രി എട്ടു മുതല്‍ പത്തു വരെയും ക്രിസ്മസ്, പുതുവര്‍ഷ ആഘോഷങ്ങള്‍ക്ക് രാത്രി 11:55 മുതല്‍ 12:30 വരെയും മാത്രമേ പടക്കങ്ങള്‍ പൊട്ടിക്കാന്‍ പാടുള്ളൂ എന്നായിരുന്നു സുപ്രിംകോടതി ഉത്തരവിട്ടത്. ബാക്കിയുള്ള സമയങ്ങളില്‍ പടക്കം പൊട്ടിക്കുന്നത് നിരോധിച്ചിരുന്നു.
പിന്നീട് തമിഴ്‌നാടിന് മാത്രം ദീപാവലിക്ക് പകല്‍ സമയം രണ്ടുമണിക്കൂര്‍ ഇളവ് നല്‍കി. ഇത്തരത്തിലൊരു ഇളവ് തൃശൂര്‍ പൂരത്തിന് പ്രത്യേകമായി ആവശ്യപ്പെട്ടാണ് സുപ്രിംകോടതിയില്‍ ഹരജി നല്‍കിയിരിക്കുന്നത്. ഓലപ്പടക്കം, അമിട്ട്, കുഴിമിന്നല്‍, ബേരിയം രാസവസ്തു ഉപയോഗിച്ചുള്ള പടക്കങ്ങള്‍ തുടങ്ങിയവ ഉപയോഗിക്കാന്‍ അനുമതി വേണമെന്നും ഹരജിയില്‍ ആവശ്യപ്പെട്ടിട്ടുണ്ട്.