മാനന്തവാടി: ആദിവാസി വയോധികന് റേഷന്‍ കടയില്‍ നിന്ന് പുഴുക്കള്‍ നിറഞ്ഞ അരി നല്‍കിയതായി പരാതി. ഒണ്ടയങ്ങാടി എടപ്പടി വാകേരി കോളനിയിലെ വെള്ളുവിനാണ് പുഴുക്കള്‍ നിറഞ്ഞ അരി ലഭിച്ചത്.
 കാട്ടിക്കുളത്തെ റേഷന്‍കടയില്‍ നിന്നാണ് താന്‍ അരി വാങ്ങിയതെന്ന് വെള്ളു പറഞ്ഞു. റേഷന്‍കടയില്‍ നിന്ന് മാസത്തില്‍ സൗജന്യമായി ലഭിക്കുന്ന 25 കിലോ അരി വലിയ ആശ്വാസം നല്‍കുന്നുണ്ട്. ഈ അരിയുള്ളതു കൊണ്ടാണ് പട്ടിണിയില്ലാതെ കഴിയുന്നത്. വെള്ളിയാഴ്ച വിഷു ആയതിനാല്‍ ചൊവ്വാഴ്ചയാണ് താന്‍ അരി വാങ്ങാന്‍ പോയത്. 160 രൂപ ഓട്ടോറിക്ഷയ്ക്ക് നല്‍കിയാണ് അരി വീട്ടിലെത്തിച്ചത്. ഒരു ദിവസം ഈ അരി കൊണ്ട് കഞ്ഞി വച്ചു കുടിച്ചിരുന്നു. വ്യാഴാഴ്ച മകള്‍ വീട്ടിലെത്തിയപ്പോഴാണ് അരിയില്‍ നിറയെ പുഴുക്കൂടുകള്‍ കണ്ടതെന്നും വെള്ളു പറഞ്ഞു.
ഗതാഗത സൗകര്യം പോലുമില്ലാത്ത ഇവിടേക്ക് എത്തിപ്പെടാന്‍ വളരെ പ്രയാസമാണ്. പ്രായം ചെന്ന ഭാര്യ കാളിക്കൊപ്പമാണ് വെള്ളുവിന്റെ താമസം. സമീപത്ത് മക്കള്‍ താമസിക്കുന്നുണ്ടെങ്കിലും അവര്‍ പാചകം ചെയ്യുന്ന ആഹാരമൊന്നും വെള്ളു കഴിക്കാറില്ല. പണ്ടു മുതല്‍ക്കേ തുടങ്ങിയതാണ് സ്വയമുണ്ടാക്കിക്കഴിക്കുന്ന രീതി. മുന്‍പ് സമീപത്തെ ക്വാറിയില്‍ തൊഴിലാളിയായിരുന്നു വെള്ളു. കരിങ്കല്‍ ചീളു തെറിച്ചതിനാല്‍ ഇടതു കണ്ണിന്റെ കാഴ്ച പൂര്‍ണമായും നഷ്ടപ്പെട്ടു. തിമിരം ബാധിച്ച വലതു കണ്ണിലൂടെയാണ് അല്‍പമെങ്കിലും കാണുന്നത്. കാട്ടിക്കുളം വാകേരിയില്‍ താമസിച്ചിരുന്ന വെള്ളുവും കുടുംബവും ഒണ്ടയങ്ങാടി എടപ്പടി കോളനിയിലേക്ക് താമസം മാറുകയായിരുന്നു. മുന്‍പ് സാധനങ്ങള്‍ വാങ്ങിയ റേഷന്‍കടയില്‍ നിന്നാണ് ഇപ്പോഴും വാങ്ങുന്നത്. തുടര്‍ന്ന് ഇവര്‍ അറിയിച്ചതു പ്രകാരം പട്ടികവര്‍ഗ പ്രമോട്ടര്‍ കോളനിയിലെത്തി പരിശോധന നടത്തി. പുഴുക്കളുണ്ടെന്ന് ബോധ്യപ്പെട്ടതിനെ തുടര്‍ന്ന് ഇവര്‍ ടി.ഡി.ഒയെ വിവരമറിയിച്ചിട്ടുണ്ട്.