മാനന്തവാടി: വള്ളിയൂര്‍ക്കാവ് - മാനന്തവാടി റോഡിലെ ബിവറേജസ് ഔട്ട്‌ലെറ്റിന് മുന്നില്‍ ആദിവാസി അമ്മമാര്‍ നടത്തിവരുന്ന സമരം അന്യായമായ കേസ് ചുമത്തി തടസ്സപ്പെടുത്തുന്നതിനുള്ള നീക്കം അധികാരികളുടെ ഭാഗത്ത് നിന്നുണ്ടായ സാഹചര്യത്തില്‍ ഈമാസം 17 മുതല്‍ സബ് കലക്ടര്‍ ഓഫിസിന് മുന്നില്‍ സത്യാഗ്രഹ സമരം ആരംഭിക്കുമെന്ന് സമരസമിതി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
 2016 ജനുവരി 27ന് സമരം ആരംഭിച്ചത് മുതല്‍ സമരത്തെ തകര്‍ക്കാനുള്ള നീക്കം അധികൃതരുടെ ഭാഗത്ത് നിന്നുണ്ടായിരുന്നു. കള്ള പരാതികളില്‍ സമരക്കാരുടെയും മദ്യവിരുദ്ധ പ്രവര്‍ത്തകരുടെയും പേരില്‍ നിരവധി കേസുകളുകളും ഇതിനകം ചുമത്തിയിട്ടുണ്ട്. 440 ദിവസമായി സമരക്കാര്‍ ഉന്നയിക്കുന്ന ഗൗരവതരമായ സാമൂഹ്യ പ്രശ്‌നത്തെ കണ്ടില്ലെന്ന് നടിക്കുകയും അധികാരത്തിന്റെ ഹുങ്ക് കൊണ്ട് ജാമ്യമില്ലാ വകുപ്പുകള്‍ ചുമത്തി കേസുകളും അറസ്റ്റ് നടപടികളും നടത്തുകയും ചെയ്തു.
ഇത് ആദിവാസി സമൂഹത്തോട് ഈ സര്‍ക്കാരിന്റെ മനോഭാവമാണ് സൂചിപ്പിക്കുന്നത്. ഇത്തരം നടപടികള്‍ കൊണ്ട് തങ്ങളുടെ മനോധൈര്യത്തെ തകര്‍ക്കാനാവില്ലെന്നും വള്ളിയൂര്‍ക്കാവ് റോഡിലെ ബിവറേജ് ഔട്ട്‌ലെറ്റ് അടച്ച് പൂട്ടുന്നത് വരെ സമരം തുടരുമെന്നും ഇവര്‍ പറഞ്ഞു.
മാക്ക പയ്യംമ്പള്ളി, വെള്ള സോമന്‍, ജോണ്‍ മാസ്റ്റര്‍, മുജീബ് റഹ്മാന്‍, ശ്രീജിത്ത് മുണ്ടേരി, എം.എസ് ഉണ്ണി വാര്‍ത്താസമ്മേളനത്തില്‍ പങ്കെടുത്തു.