മനാമ: മറ്റുള്ളവരുടെ ബാങ്ക് കാര്‍ഡ് വിവരങ്ങള്‍ ദുരുപയോഗം ചെയ്ത് വിലകൂടിയ ബി.എം.ഡബ്ലിയു കാര്‍ സ്വന്തമാക്കാന്‍ ശ്രമിച്ച കേസില്‍ അറബ് സ്വദേശിയായ പ്രതിക്ക് മൂന്ന് വര്‍ഷം തടവും പിഴയും ശിക്ഷയായി വിധിച്ചു. ശിക്ഷ അനുഭവിച്ച ശേഷം പ്രതിയെ രാജ്യത്ത് നിന്ന് നാടുകടത്താനും കോടതി ഉത്തരവിട്ടു.

കോടതി രേഖകള്‍ പ്രകാരം, പ്രതി ഒരു കാര്‍ ഷോറുമില്‍ എത്തുകയും  ഏകദേശം 25,000 ബഹ്‌റൈന്‍ ദിനാര്‍ വിലവരുന്ന ബി.എം.ഡബ്ലിയു 320 മോഡല്‍ കാര്‍ തിരഞ്ഞെടുക്കുകയുമായിരുന്നു. തുടര്‍ന്ന് വാഹനം സ്വന്തമാക്കുന്നതിനായി കമ്പനി നല്‍കിയ ഓണ്‍ലൈന്‍ പേയ്‌മെന്റ് ലിങ്ക് ഉപയോഗിച്ചാണ് പണമടയ്ക്കാന്‍ ശ്രമിച്ചത്.

ഡിസംബര്‍ മാസത്തില്‍ പ്രതി പലതവണയായി പണം ട്രാന്‍സ്ഫര്‍ ചെയ്തു. ആകെ 10,080 ദിനാര്‍ ഇതിലൂടെ അടച്ചതായി കണ്ടെത്തി. എന്നാല്‍ ഈ പണം പ്രതിയുടെ സ്വന്തം ബാങ്ക് കാര്‍ഡില്‍ നിന്നല്ലായിരുന്നു. അന്വേഷണത്തില്‍, മറ്റ് വ്യക്തികളുടെ ബാങ്ക് കാര്‍ഡ് വിവരങ്ങള്‍ ഉപയോഗിച്ചാണ് ഇടപാട് നടത്തിയതെന്ന് വ്യക്തമായി.

സംഭവം സംശയാസ്പദമാണെന്ന് കണ്ടെത്തിയതോടെ ബന്ധപ്പെട്ട അധികാരികള്‍ അന്വേഷണം ആരംഭിച്ചതിനെ, തുടര്‍ന്ന് നടത്തിയ പരിശോധനയില്‍ പ്രതി അനധികൃതമായി ബാങ്ക് കാര്‍ഡ് വിവരങ്ങള്‍ കൈവശപ്പെടുത്തി ഉപയോഗിച്ചതായി തെളിഞ്ഞു. ഇതിന്റെ അടിസ്ഥാനത്തിലാണ് പ്രതിയെ അറസ്റ്റ് ചെയ്ത് കോടതിയില്‍ ഹാജരാക്കിയത്.

കേസിന്റെ വിചാരണക്കൊടുവില്‍ പ്രതി കുറ്റക്കാരനാണെന്ന് കോടതി കണ്ടെത്തി മൂന്ന് വര്‍ഷം തടവും 3,000 ബഹ്‌റൈന്‍ ദിനാര്‍ പിഴയും വിധിച്ചു. കൂടാതെ കുറ്റകൃത്യത്തിന് ഉപയോഗിച്ച മൊബൈല്‍ ഫോണ്‍ പിടിച്ചെടുക്കാനും ശിക്ഷ പൂര്‍ത്തിയാക്കിയ ശേഷം പ്രതിയെ നാടുകടത്താനും കോടതി ഉത്തരവിട്ടു.

ഓണ്‍ലൈന്‍ സാമ്പത്തിക ഇടപാടുകള്‍ വര്‍ധിച്ചുവരുന്ന സാഹചര്യത്തില്‍ ബാങ്ക് കാര്‍ഡ് വിവരങ്ങള്‍ സുരക്ഷിതമായി സൂക്ഷിക്കേണ്ടതിന്റെ ആവശ്യകതയെ ഈ സംഭവം വീണ്ടും ചൂണ്ടിക്കാട്ടുന്നതായി അധികൃതര്‍ വ്യക്തമാക്കി.

A Bahrain court sentenced an Arab man to three years in jail, fined him, and ordered deportation after he used stolen bank card details to attempt purchasing a BMW through online payment fraud.