മയ്യില്‍: പുതുതായി ആരംഭിച്ച പാടിക്കുന്നിലെ മദ്യഷാപ്പിനെതിരെ സമരം ചെയ്ത സ്ത്രീകളും കുട്ടികളുമടക്കമുള്ള സമരക്കാരെ പൊലിസ് അറസ്റ്റുചെയ്തു നീക്കി.
ഇന്നലെ രാവിലെ പതിനൊന്ന് മണിയോടെയാണ് അന്‍പതോളം വരുന്ന സമരക്കാരെ വളപട്ടണം സി.ഐ രത്കുമാര്‍, മയ്യില്‍ എസ്.ഐ പി ബാബു മോന്‍ എന്നിവരുടെ നേതൃത്വത്തിലുള്ള പൊലിസ് സംഘം അറസ്റ്റുചെയ്തു നീക്കിയത്. ഉപരോധത്തെ തുടര്‍ന്ന് ബുധനാഴ്ച മദ്യശാല തുറക്കാന്‍ സാധിച്ചിരുന്നില്ല. ഇന്നലെയും സമരക്കാര്‍ പ്രതിഷേധവുമായി രംഗത്ത് വന്നു. വിഷുവിന്റെ തലേദിവസമായതിനാല്‍ രാവിലെ തന്നെ നിരവധി പേര്‍ മദ്യം വാങ്ങാനായി ഇവിടെ എത്തിയിരുന്നു. ഇതിനിടെ സമരക്കാരും മദ്യം വാങ്ങാനെത്തിയവരും തമ്മില്‍ വാക്കു തര്‍ക്കത്തില്‍ ഏര്‍പ്പെട്ടത് സ്ഥലത്ത് സംഘര്‍ഷാവസ്ഥ ഉടലെടുത്തു. ഇതോടെ സമരക്കാരോട് പിരിഞ്ഞു പോവാന്‍ പൊലിസ്ആവശ്യപ്പെട്ടു. എന്നാല്‍ സമരക്കാര്‍ പിരിഞ്ഞു പോവാന്‍ വിസമ്മതിച്ചു. പിന്നീട് കൂടുതല്‍  പൊലിസെത്തി സമരക്കാരെ അറസ്റ്റു ചെയ്തു നീക്കുകയായിരുന്നു. പിന്നീട് ഇവരെ ജാമ്യത്തില്‍ വിട്ടയച്ചു. അറസ്റ്റു വരിച്ച സമരക്കാര്‍ മയ്യില്‍ ടൗണില്‍ പ്രതിഷേധ പ്രകടനം നടത്തി. ഇ.കെ മധു, കെ.സി ഗണേശന്‍, വി.വി മനോജ്, പി.വി ശ്രീനിവാസന്‍, കെ.പി ചന്ദ്രന്‍, ഷംസീര്‍ മയ്യില്‍, കെ.വി മനോജ് കുമാര്‍, എം അന്‍സാരി നേതൃത്വം നല്‍കി.