കണ്ണൂര്‍: എസ്.ഡി.പി.ഐയുടെ സഹായത്താല്‍ ഏതെങ്കിലും സ്ഥാനം നേടുന്നതിലും ഭേദം മുസ്‌ലിംലീഗ് പിരിച്ചുവിടുന്നതാണെന്ന് പ്രതിപക്ഷ ഉപനേതാവ് എം.കെ മുനീര്‍.
യു.ഡി.എഫ് കണ്ണൂര്‍ ലോക്‌സഭാ മണ്ഡലം കണ്‍വന്‍ഷന്‍ ഉദ്ഘാടനം ചെയ്യുകയായിരുന്നു അദ്ദേഹം. ആര്‍.എസ്.എസിനെ എതിര്‍ക്കുന്നതുപോലെ എസ്.ഡി.പി.ഐയെയും എതിര്‍ക്കും. പരസ്പരം പാലൂട്ടി വളര്‍ന്നതാണ് ഇരുസംഘടനകളും.

വഴിയെ പോകുന്ന ആരെങ്കിലും കൈപിടിച്ചു കുലുക്കിയാല്‍ താഴ്ന്നുപോകുന്നതല്ല ലീഗിന്റെ നിലപാട്. അപ്പൂപ്പന്‍ താടി കാറ്റില്‍ പാറിപ്പോകുന്നതുപോലെയൊന്നും ലീഗിന്റെ ആദര്‍ശത്തില്‍ മാറ്റമുണ്ടാകില്ല. പറപ്പൂല്‍ പഞ്ചായത്തില്‍ എസ്.ഡി.പി.ഐയുമായി ചേര്‍ന്ന് ഭരിക്കുന്നവരാണ് സി.പി.എം. ആദ്യം ആ ബന്ധം അവസാനിപ്പിച്ചിട്ടുവേണം ലീഗിനെ വിമര്‍ശിക്കാനെന്നും മുനീര്‍ പറഞ്ഞു.

ലീഗ് പണ്ടേ പിരിച്ചുവിടേണ്ടിവരുമായിരുന്നു: എസ്.ഡി.പി.ഐ

കോഴിക്കോട്: എം.കെ മുനീറിന്റെ പ്രസ്താവനക്കെതിരേ എസ്.ഡി.പി.ഐ രംഗത്ത്.
എസ്.ഡി.പി.ഐയുടെ സഹായത്തില്‍ ജയിക്കുന്നതിനേക്കാള്‍ നല്ലത് പാര്‍ട്ടി പിരിച്ചുവിടുന്നതാണ് നല്ലതെങ്കില്‍ ലീഗ് പണ്ടേ പിരിച്ചുവിടേണ്ടി വരുമായിരുന്നുവെന്ന് എസ്.ഡി.പി.ഐ സംസ്ഥാന ജനറല്‍ സെക്രട്ടറി പി. അബ്ദുല്‍ ഹമീദ് പറഞ്ഞു. ലീഗ് നേതാക്കള്‍ മുന്‍കാല ചരിത്രം മറക്കരുതെന്നും അദ്ദേഹം പറഞ്ഞു.