രണ്ടു പേര്‍ക്കുകൂടി രോഗം സ്ഥിരീകരിച്ചു,

ഡിഫ്തീരിയ ബാധിച്ചവരുടെ എണ്ണം 18

കോഴിക്കോട്: ഡിഫ്തീരിയ ഭീതിയില്‍ ജില്ല വിറയ്ക്കുന്നു. ഇന്നലെയും ജില്ലയില്‍ രണ്ടു പേര്‍ക്ക് ഡിഫ്തീരിയ ബാധ സ്ഥിരീകരിച്ചു. ഭട്ട് റോഡ് സ്വദേശിയായ 12 വയസുകാരനും നല്ലളം സ്വദേശിയായ വയോധികക്കുമാണ് രോഗം സ്ഥിരീകരിച്ചത്. രണ്ടു പേരും മെഡിക്കല്‍ കോളജ് ആശുപത്രിയില്‍ ചികിത്സ തേടി. ഇതോടെ ജില്ലയില്‍ ഡിഫ്തീരിയ ബാധിച്ചവരുടെ എണ്ണം പതിനെട്ടായി. ആറു പേരെ ഡിഫ്തീരിയ ലക്ഷണങ്ങളോടെ ആശുപത്രിയില്‍ പ്രവേശിപ്പിച്ചു.
ഇതിനിടെ ആരോഗ്യവകുപ്പ് പ്രതിരോധനടപടികള്‍ ഊര്‍ജിതമായി നടപ്പാക്കുന്നുണ്ടെങ്കിലും ഡിഫ്തീരിയ ബാധിതരുടെ എണ്ണം കൂടുകയാണ്. ഡിഫ്തീരിയ രോഗികളുമായി അടുത്തിടപഴകുന്നവര്‍ക്ക് ആരോഗ്യപ്രവര്‍ത്തകര്‍ പ്രതിരോധ വാക്‌സിന്‍ നല്‍കുന്നുണ്ട്. മെഡിക്കല്‍ കോളജിലെ ജീവനക്കാര്‍ക്കും ടി.ഡി വാക്‌സിന്‍ നല്‍കിവരുന്നു.
പ്രതിരോധ കുത്തിവയ്‌പ്പെടുക്കാത്ത പ്രദേശങ്ങളില്‍ വിവിധ സ്‌ക്വാഡുകളായി തിരിഞ്ഞും ആരോഗ്യവകുപ്പ് പ്രവര്‍ത്തിക്കുന്നുണ്ട്.
അതേസമയം, കൂടുതല്‍ പേര്‍ക്ക് രോഗം സ്ഥിരീകരിച്ച സാഹചര്യത്തില്‍ മെഡിക്കല്‍ കോളജിനു പുറമെ ബീച്ച് ആശുപത്രിയിലും ഡിഫ്തീരിയക്കുള്ള ചികിത്സ ലഭ്യമാക്കണമെന്ന ആവശ്യവും ഉയര്‍ന്നു. ഡിഫ്തീരിയ ചികിത്സയ്ക്കാവശ്യമായ ടി.ഡി വാക്‌സിന്‍ ഇനിയും ആവശ്യമായി വരുമെന്ന നിലപാടിലാണ് ആരോഗ്യവകുപ്പ്.