കട്ടപ്പന: സീറോ ലാന്‍ഡ് പദ്ധതിയില്‍ പതിച്ചുനല്‍കിയ ഭൂമിയില്‍നിന്ന് റവന്യു ഉദ്യാഗസ്ഥരുടെ അനുമതിയോടെ മരങ്ങള്‍ മുറിച്ചുകടത്തിയതായി പരാതി. ഉപ്പുതറ പഞ്ചായത്തിലെ കരിന്തരുവി ആറാം മൈലിനു സമീപം 27 പുതുവലില്‍നിന്നാണ് മരങ്ങള്‍ മുറിച്ചുകടത്തിയത്.
രണ്ടുവര്‍ഷം മുന്‍പ് പട്ടയം ലഭിച്ച ഉടമസ്ഥരറിയാതെയാണ് നടപടി. കാടുവെട്ടിത്തെളിക്കാനുള്ള അനുമതിയുടെ മറവില്‍ മരുത്, വേമ്പ്, വേങ്ങ, ആഫ്രിക്കന്‍ ഷെയ്ഡ് തുടങ്ങിയ മരങ്ങളാണ് മുറിച്ചത്. രണ്ടുവര്‍ഷം മുന്‍പ് മൂന്നുസെന്റ് സീറോ ലാന്‍ഡ് പദ്ധതിയില്‍ 55 പേര്‍ക്കാണ് ഇവിടെ പട്ടയം നല്‍കിയത്.
ഭൂമി അളന്നുതിരിക്കാന്‍ മൂന്നുമാസം മുന്‍പ് കാടുവെട്ടിത്തെളിക്കാനാണ് കരാര്‍ നല്‍കിയതെന്ന് വില്ലേജ് ഓഫിസര്‍ റാണി പറഞ്ഞു. എന്നാല്‍ ഇവിടെമെല്ലാം ഇപ്പോഴും കാട് വളര്‍ന്നുനില്‍ക്കുകയാണ്. കാടുവെട്ടാതെ മരങ്ങള്‍ മുറിച്ചുകടത്തി എന്നാണ് സീറോ ലാന്‍ഡ് ഗുണഭോക്താക്കളുടെ പരാതി. സീറോ ലാന്‍ഡ് പദ്ധതിയുടെ ഭൂമി അളന്നുതിരിക്കുന്നതിന് കാട് വെട്ടിത്തെളിക്കാന്‍ 85,000 രൂപയാണ് റവന്യൂ വകുപ്പ് ചെലവഴിച്ചത്.