വടകര: അസഹിഷ്ണുതയും എതിര്‍ശബ്ദങ്ങളെ അംഗീകരിക്കാത്ത സ്വഭാവവുമാണ് സി.പി.എം രാഷ്ട്രീയത്തിന്റെ മുഖമുദ്രയെന്ന് ആര്‍.എം.പി.ഐ നേതാവ് കെ.കെ രമ.
ഇന്നലെ പേരാമ്പ്ര സി.കെ.ജി കോളജില്‍ കെ. മുരളീധരന്റെ പര്യടനം തടഞ്ഞ എസ്.എഫ്.ഐ നടപടിയെക്കുറിച്ചു സംസാരിക്കുകയായിരുന്നു രമ. 2008 മുതല്‍ സി.പി.എമ്മിന്റെ ഫാസിസത്തിന്റെ ഇരകളാണ് ആര്‍.എം.പി.ഐ. ഇവരുടെ അസഹിഷ്ണുതയാണ് ടി.പി ചന്ദ്രശേഖരന്റെ ജീവനെടുത്തത്.
2009ലെ തെരഞ്ഞെടുപ്പില്‍ കണ്ണൂര്‍ ജില്ലയില്‍ പര്യടനം നടത്താന്‍ അനുവദിക്കാതെ ടി.പി ചന്ദ്രശേഖരനെ അക്രമിച്ചതും സി.പി.എമ്മിന്റെ അക്രമരാഷ്ട്രീയമാണ്. ഇതാണ് ഇന്നലെ മുരളീധരനെതിരേ നടന്നതെന്ന് രമ പറഞ്ഞു.
ഇന്നും ഒഞ്ചിയം ഏരിയയില്‍ ജീവച്ഛവങ്ങളായി കഴിയുന്ന ആര്‍.എം.പി.ഐ പ്രവര്‍ത്തകരുടെ ജീവിതവും സി.പി.എമ്മിന്റെ അരുംകൊല രാഷ്ട്രീയത്തിന്റെ പ്രത്യക്ഷ ഉദാഹരണമാണ്.
ഈ രാഷ്ട്രീയത്തിന് എതിരേയാണ് ആര്‍.എം.പി.ഐ ഇപ്പോള്‍ തെരഞ്ഞെടുപ്പില്‍ സ്വീകരിച്ചിരിക്കുന്ന നിലപാടും. എതിര്‍ത്തു സംസാരിക്കുന്നവര്‍ക്കും ഇവിടെ ജീവിക്കണം. അതിനുവേണ്ടിയുള്ള ജനാധിപത്യപ്രക്രിയയിലാണ് വടകരയിലെ ജനങ്ങളെന്നും രമ കൂട്ടിച്ചേര്‍ത്തു.