ഹരിപ്പാട്: സ്‌കൂള്‍ കോളജ് വിദ്യാര്‍ഥികള്‍ക്ക് സ്ഥിരമായി കഞ്ചാവ് വില്‍പന നടത്തി വരുന്ന സംഘത്തിലെ രണ്ട് പേരെ ഹരിപ്പാട് സി.ഐ. ടി. മനോജിന്റെ നേതൃത്വത്തില്‍ അറസ്റ്റ് ചെയ്തു.കോട്ടയം ആനിക്കാട് മുക്കാലി വേണ്ടാനത്തില്‍ സനീഷ്(23),ചെന്നിത്തല തൃപ്പെരുന്തുറ വാഴക്കൂട്ടത്തില്‍ ജഫിന്‍ (22) എന്നിവരെയാണ് പിടികൂടിയത്.14 പൊതികളിലായി സൂക്ഷിച്ചിരുന്ന 62 ഗ്രാം കഞ്ചാവ് പിടിച്ചെടുത്തു.
രഹസ്യവിവരത്തെ തുടര്‍ന്ന് ഒരാഴ്ചയിലേറെയായി ഇവര്‍ പൊലിസ് നിരീക്ഷണത്തിലായിരുന്നു. ഇന്നലെ ഉച്ച മുതല്‍ പള്ളിപ്പാട്ട് കാത്തു നിന്നിരുന്ന പൊലിസ് സംഘം വൈകിട്ട് ആറരയോടെ എത്തിയ ഇവരെ കൈയോടെ പിടികൂടുകയായിരുന്നു.പത്തനംതിട്ട, കോട്ടയം, ആലപ്പുഴ ജില്ലകള്‍ കേന്ദ്രീകരിച്ചായിരുന്നു ഇവരുടെ വില്‍പന.
പള്ളിപ്പാട്ട് നല്ല കച്ചവടം ലഭിക്കുമെന്ന് കണ്ട് പ്രവര്‍ത്തന രംഗം ഇവിടേക്ക് മാറ്റുകയായിരുന്നു.ഇവരില്‍ നിന്ന് പതിവായി കഞ്ചാവ് വാങ്ങുന്നവരുടെ വിവരങ്ങള്‍ ശേഖരിച്ചിട്ടുണ്ട്. ഇതനുസരിച്ച് അന്വേഷണം ഊര്‍ജിതമാക്കും.
അഡീഷണല്‍ എസ്.ഐ സജി, എസ്.പിയുടെ സ്‌പെഷ്യല്‍ സ്‌ക്വാഡ് അംഗങ്ങളായ സന്തോഷ്, ഇല്യാസ് എന്നിവരും അന്വേഷണ സംഘത്തിലുണ്ടായിരുന്നു.പ്രതികളെ ഇന്നലെ രാത്രി വൈദ്യ പരിശോധനക്ക് വിധേയരാക്കി.
ഇന്ന് ഹരിപ്പാട് ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കും.