പോര്‍ട്ടോ: സൗഹൃദ മത്സരത്തില്‍ പാനമയെ നേരിട്ട ബ്രസീലിന് സമനില. കഴിഞ്ഞ ദിവസം നടന്ന മത്സരത്തില്‍ 1-1നാണ് പാനമ ബ്രസീലിനെ സമനിലയില്‍ തളച്ചത്. കാസാമിറോ, ഫിര്‍മീഞ്ഞോ, കുട്ടീഞ്ഞോ തുടങ്ങിയ മുന്‍നിര താരങ്ങളെല്ലാം ഇറങ്ങിയിട്ടും ബ്രസീലിന് സമനിലകൊണ്ട് തൃപ്തിപ്പെടേണ്ടി വന്നു. 32-ാം മിനുട്ടില്‍ ലൂക്കാസ് പക്വേറ്റയിലൂടെ ബ്രസീലായിരുന്നു ആദ്യം ഗോള്‍ കണ്ടെത്തിയത്. എന്നാല്‍, നാലുമിനുട്ടിനുശേഷം അഡോള്‍ഫോ മച്ചാഡോ പാനമയ്ക്ക് സമനില സമ്മാനിച്ചു. ഗോള്‍ കണ്ടെത്തുന്നതിനായി ബ്രസീല്‍ അക്രമിച്ച് കളിച്ചെങ്കിലും പാനമയുടെ പ്രതിരോധം മറികടക്കാന്‍ മഞ്ഞപ്പടക്കായില്ല. പരുക്കേറ്റ സൂപ്പര്‍ താരം നെയ്മറിന്റെ അസാന്നിധ്യത്തിലായിരുന്നു കാനറികള്‍ കളത്തിലിറങ്ങിയത്. യൂറോ 2020 യോഗ്യതാ മത്സരത്തില്‍ ഫിന്‍ലന്‍ഡിനെ ഏകപക്ഷീയമായ രണ്ട@ു ഗോളുകള്‍ക്ക് ഇറ്റലി പരാജയപ്പെടുത്തി. ഇറ്റലിക്കായി നിക്കോളോ ബരേല്ല(7), മൊയ്‌സി കീന്‍(74) എന്നിവരാണ് ഗോള്‍ കണ്ടെത്തിയത്. മറ്റൊരു മത്സരത്തില്‍ നോര്‍വേക്കെതിരേ സ്‌പെയിന്‍ 2-1 എന്ന സ്‌കോറിന് ജയം കണ്ടെത്തി. റോഡ്രിഗോ(16), സെര്‍ജിയോ റാമോസ്(71) എന്നിവരാണ് സ്‌പെയിനിന് വേണ്ടി വല ചലിപ്പിച്ചവര്‍. ജോഷ്വ കിങ്(65) ആണ് നോര്‍വേയുടെ ഗോള്‍ സ്‌കോറര്‍. കൂടുതല്‍ ഗോളുകള്‍ക്ക് സ്‌പെയിനിന് ജയിക്കാമായിരുന്നെങ്കിലും ഫിനിഷിങിലെ പോരായ്മയാണ് പലപ്പോഴും സ്‌പെയിനിന് ഗോള്‍ നിഷേധിച്ചത്.