കാക്കനാട്: കഴിഞ്ഞ വര്‍ഷത്തെ അപേക്ഷിച്ച് ഈ വര്‍ഷം  ജില്ലയില്‍ പാലുല്‍പ്പാദനം കുറഞ്ഞു. കടുത്ത ചൂടില്‍ തീറ്റപ്പുല്ലിന്റെ ലഭ്യത ഇല്ലാതായതാണ് പാലുല്‍പ്പാദനം  കുറയാന്‍ കാരണമെന്ന് ക്ഷീര വികസന വകുപ്പ് പറയുന്നത്.
മില്‍ക്ക് സൊസൈറ്റികളില്‍ പ്രതിദിന സംഭരണത്തില്‍ ഏകദേശം നാലായിരം ലിറ്ററാണ് കുറവുണ്ടാകുന്നത്. 313 മില്‍ക്ക് സൊസൈറ്റികളാണ് ജില്ലയില്‍ പ്രവര്‍ത്തിക്കുന്നത്.  കഴിഞ്ഞ വര്‍ഷം മില്‍ക്ക് സൊസൈറ്റികളില്‍ പ്രതിദിനം 1,14,000 ലിറ്റര്‍ പാല്‍ സംഭരിച്ചിരുന്നിടത്ത് ഇത്തവണ 1,10,000 ലിറ്ററായി കുറഞ്ഞു.
ബഹുഭൂരിപക്ഷം കര്‍ഷകര്‍ വളര്‍ത്തുന്ന സങ്കരയിനം പശുക്കളെ ദിവസവും മൂന്നും നാലും പ്രാവശ്യം കുളിപ്പിച്ച് പാലുല്‍പ്പാദനം കൂട്ടാന്‍ കര്‍ഷകര്‍ കിണഞ്ഞു ശ്രമിക്കുന്നുണ്ടെങ്കിലും ഫലവത്താകുന്നില്ലെന്നാണ് കര്‍ഷകര്‍ പറയുന്നത്. ശരാശരി പത്ത് മുതല്‍ 15 ലിറ്റര്‍ വരെ ലഭിച്ചിരുന്നിടത്ത് എട്ട്പത്ത് ലിറ്ററായി പാലുല്‍പ്പാദനം കുറഞ്ഞു.
തണുപ്പ് കാലാവസ്ഥയില്‍ വളരുന്ന സങ്കരയിനം പശുക്കളെ പരിപാലിക്കാനുള്ള ചെലവും കൂടി. കേളഫീഡ്‌സിന്റെ വില കൂടിയതും ആവശ്യത്തിനുസരിച്ച് ലഭ്യമല്ലാത്തതും കര്‍ഷര്‍ക്ക് തിരിച്ചടിയായി. സൂര്യഘാതമേറ്റ് പശുക്കള്‍ ചത്തുപോകുന്നത് കൂടിയായതോടെ കര്‍ഷകരെ കുത്തുപാളയെടുപ്പിക്കുന്ന അവസ്ഥയിലാണ്. ധനസഹായം ആവശ്യപ്പെട്ട് കര്‍ഷര്‍ നല്‍കിയ അപേക്ഷകളെല്ലാം കെട്ടിക്കിടക്കുകയാണ്. ഇത് കൂടാതെയാണ് ഇത്തവണ ഡിസംബര്‍ മുതല്‍ ഇതുവരെ 34 പശുക്കള്‍ സൂര്യാഘാതമേറ്റ് ചത്തത്.