ചങ്ങനാശേരി: കവിയൂര്‍ റോഡിലും വാഴൂര്‍ റോഡില്‍ ടിപ്പറുകളുടെ മത്സരയോട്ടമൂലം നാട്ടുകാര്‍ ബുദ്ധിമുട്ടുന്നു. മണ്ണുകയറ്റി പായുന്ന ടിപ്പറുകള്‍ ശരിയായി മൂടാത്തതുമൂലം റോഡിലേക്കു മണ്ണു വീഴുന്നതു യാത്രക്കാര്‍ക്കു ബുദ്ധിമുട്ടാകുന്നു.  കഴിഞ്ഞ ദിവസം കൊച്ചുറോഡില്‍ ടിപ്പറില്‍ നിന്നും മണ്ണു വീണതിനെ തുടര്‍ന്ന് നാട്ടുകാര്‍ ടിപ്പര്‍ ലോറികള്‍ തടഞ്ഞു. ചങ്ങനാശേരി എ.പി.ജെ.അബ്ദുള്‍ കലാം റോഡിലൂടെ അമിതവേഗത്തില്‍ മണ്ണുമായി പാഞ്ഞ ടിപ്പറില്‍നിന്നു മണ്ണ് റോഡിലേക്കുവീണു.വാഹനയാത്രക്കാരുടെയും കാല്‍നടയാത്രക്കാര്‍ക്കും ബുദ്ധിമുട്ടുണ്ടാക്കുന്ന തരത്തിലാണ് ടിപ്പറുകള്‍ പായുന്നത്. കടുത്ത വേനലും കുടിവെള്ളക്ഷാമം രൂക്ഷമായിട്ടും താലൂക്കിന്റെ വിവിധ പ്രദേശങ്ങളില്‍ മണ്ണെടുപ്പ് വ്യാപകമാണെന്ന ആക്ഷേപമുണ്ട്.  ട്രിപ്പ് കൂടുന്നതിനനുസരിച്ച് കമ്മീഷന്‍ കൂടുമെന്നതിനാല്‍ കടിഞ്ഞാണില്ലാതെയാണ് ടിപ്പറുകള്‍ പായുന്നത്. കഴിഞ്ഞ മൂന്നുമാസത്തിനിടയില്‍ വലുതും ചെറുതുമായ നിരവധി അപകടങ്ങളാണ് ഉണ്ടായത്. ടിപ്പറുകളുടെ അമിതവേഗം നിയന്ത്രിക്കുന്നതിനും യാത്രക്കാര്‍ക്ക് ബുദ്ധിമുട്ടു സൃഷ്ടിക്കാത്ത വിധത്തില്‍ മണ്ണ് മൂടിക്കെട്ടി കൊണ്ടുപോവുന്നതിനുമുള്ള നടപടി സ്വീകരിക്കണമെന്നാണ് നാട്ടുകാരുടെ ആവശ്യം.