കുവൈത്ത് സിറ്റി: കുവൈത്ത് ഔഖാഫ് മന്ത്രാലയം നേരിട്ടു നടത്തുന്ന എട്ടാമത് രാജ്യാന്തര ഹോളി ഖുര്‍ആന്‍ അവാര്‍ഡ് മത്സരത്തിന്റെ ഫലപ്രഖ്യാപനം ഇന്ന്.
കുവൈത്ത് അമീര്‍ ശൈഖ് സ്വബാഹ് അല്‍ അഹ്മദ് ജാബിര്‍ സ്വബാഹിന്റെ സ്വവസതിയായ ബയാന്‍ പാലസില്‍ വച്ചാണ് അവസാനമത്സരം നടക്കുക. വിജയികള്‍ക്കുള്ള അവാര്‍ഡ് ദാനവും അമീര്‍ നിര്‍വഹിക്കും.
അറുപതിലധികം രാജ്യങ്ങളില്‍ നിന്നുള്ള മത്സരാര്‍ഥികള്‍ മാറ്റുരയ്ക്കുന്ന രാജ്യാന്തര ഹോളി അവാര്‍ഡ് മത്സരത്തില്‍ ഇത്തവണ ഇന്ത്യയെ പ്രതിനിധീകരിച്ചത് ദാറുല്‍ ഹുദാ ഇസ്‌ലാമിക് സര്‍വകലാശാല വിദ്യാര്‍ഥികളാണ്.
ദാറുല്‍ ഹുദായിലെ ഖുര്‍ആന്‍ ഡിപ്പാര്‍ട്ട്‌മെന്റ് രണ്ടാം സെമസ്റ്റര്‍ വിദ്യാര്‍ഥികളായ ഹാഫിള് മുനീര്‍ വെള്ളില, ഹാഫിള് മുഹമ്മദ് ഹഫിയ്യ് മുഴപ്പിലങ്ങാട് എന്നിവരാണ് യഥാക്രമം ഖുര്‍ആന്‍ പാരായണം, മനഃപാഠം എന്നീ ഇനങ്ങളില്‍ മത്സരിച്ചത്. ശനി, ഞായര്‍ ദിവസങ്ങളിലായിരുന്നു ഇരുവരുടെയും മത്സരങ്ങള്‍. മത്സരാര്‍ഥികളുടെ പ്രകടനങ്ങളെല്ലാം മികവുറ്റതായിരുന്നുവെന്നും വിജയപ്രതീക്ഷയിലാണെന്നും ഇന്ത്യയില്‍ നിന്നുള്ള മത്സരാര്‍ഥികള്‍ അഭിപ്രായപ്പെട്ടു.