തിരുവനന്തപുരം: യുവാക്കളെ ലക്ഷ്യമാക്കി വന്‍തോതില്‍ മയക്കുമരുന്ന് ഗുളികകള്‍ എത്തിക്കുന്ന ഇതര സംസ്ഥാന ഏജന്റുമാര്‍ രംഗത്ത്. കാന്‍സര്‍ രോഗികള്‍ക്ക് വേദനയകറ്റാനായി നല്‍കുന്ന'നൈട്രോസെപ്പാം'ഗുളികയാണ് ലഹരിമരുന്നായി എത്തിക്കുന്നത്.
കൊച്ചിയിലും പരിസരപ്രദേശങ്ങളിലും അടുത്തിടെ ഗുളികകളുമായി ആന്റി നര്‍ക്കോട്ടിക് സെല്ലിന്റെ പിടിയിലായവരില്‍ ഏറെയും തമിഴ്‌നാട്ടില്‍ നിന്നുള്ള ഏജന്റുമാരില്‍ നിന്നാണ് ഗുളിക വാങ്ങിയതെന്ന് സമ്മതിച്ചിരുന്നു.
തമിഴ്‌നാട്ടിലെ മെഡിക്കല്‍ ഷോപ്പുകളില്‍ കൂടിയ വിലയ്ക്ക് ഇവ യഥേഷ്ടം ലഭിക്കും. കേരളത്തിലേക്ക് എത്തിക്കുന്ന ഗുളികകള്‍ പതിന്മടങ്ങു വിലയ്ക്കാണ് വില്‍ക്കുന്നത്. ഏജന്റുമാര്‍ ചില മെഡിക്കല്‍ സ്റ്റോറുകളിലും വന്‍തോതില്‍ ഗുളിക എത്തിക്കുന്നതായി പൊലിസിന് വിവരം ലഭിച്ചിട്ടുണ്ട്. ഇത്തരം മെഡിക്കല്‍ സ്റ്റോറുകള്‍ പൊലിസിന്റെ നിരീക്ഷണത്തിലാണ്.
പെണ്‍കുട്ടികള്‍ ഉള്‍പ്പെടെയുള്ളവര്‍ ഈ ഗുളിക സ്ഥിരമായി ഉപയോഗിക്കുന്നു. നൈട്രോസെപ്പാം ഗുളികയുടെ ഉപയോഗം വന്‍ ആരോഗ്യപ്രശ്‌നങ്ങള്‍ക്ക് കാരണമാകുമെന്ന മുന്നറിയിപ്പുണ്ട്. ഡോക്ടറുടെ പ്രിസ്‌ക്രിപ്ഷന്‍ ഉണ്ടെങ്കില്‍ മാത്രമേ ഈ ഗുളിക വില്‍ക്കാന്‍ പാടുള്ളൂ.