തൃക്കരിപ്പൂര്‍: തിങ്കളാഴ്ച രാത്രി ഉദുമയില്‍ വാഹനാപകടത്തില്‍ മരണപ്പെട്ട മുസ്‌ലിം ലീഗ് സംസ്ഥാന കൗണ്‍സിലര്‍ എന്‍.കെ ഹമീദ് ഹാജിയുടെ മയ്യിത്ത് വന്‍ ജനാവലിയുടെ സാന്നിധ്യത്തില്‍ പാണ്ഡ്യാല വളപ്പ് ജുമാമജ്ദില്‍ ഖബറടക്കി. ഹമീദ് ഹാജി സഞ്ചരിച്ച കാര്‍ കെ.എസ്.ആര്‍.ടി.സിയുമായി കൂട്ടിയിടിക്കുകയായിരുന്നു. വലിയപറമ്പ പഞ്ചായത്തില്‍ യു.ഡി.എഫ് പല പ്രശ്‌നങ്ങളുമായി പിളര്‍പ്പിന്റെ വക്കിലെത്തിയാലും ഹമീദ് ഹാജിയുടെ ഇടപെടല്‍ യു.ഡി.എഫിനെ എന്നും ഒറ്റക്കെട്ടായി നില്‍ക്കാന്‍ സഹായിച്ചു. എതിര്‍ രാഷ്ട്രീയ പാര്‍ട്ടികളില്‍പെട്ടവരും ഹമീദ് ഹാജിയുടെ വാക്കുകള്‍ക്ക് വില കല്‍പ്പിച്ചിരുന്നു.
പഞ്ചായത്തില്‍ മുസ്‌ലിം ലിഗിന്റെ പ്രവര്‍ത്തനത്തില്‍ മുന്നില്‍നിന്നു നയിക്കാന്‍ പരേതനു കഴിഞ്ഞു. എം. രാജഗോപാലന്‍ എം.എല്‍.എ, ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ എന്നിവര്‍ പരേതന്റെ വസതിയിലെത്തി അന്തിമോപചാരം അര്‍പ്പിച്ചു.
അനുശോചന യോഗത്തില്‍ ഗ്രാമപഞ്ചായത്ത് പ്രസിഡന്റ് എം.ടി അബ്ദുല്‍ ജബ്ബാര്‍ അധ്യക്ഷനായി. മുന്‍ എം.എല്‍.എ കെ. കുഞ്ഞിരാമന്‍ എം.സി ഖമറുദ്ദീന്‍, എ. ഹമീദ് ഹാജി, അഡ്വ. എം.ടി.പി കരീം, കെ.വി ഗംഗാധരന്‍, പി.കെ ഫൈസല്‍, കെ.കെ കുഞ്ഞബ്ദുല്ല, വി.കെ.പി ഹമീദലി, പി.പി ശാരദ, എം.കെ.എം അബ്ദുല്‍ ഖാദര്‍, എ. മുസ്തഫ ഹാജി, സി.വി കണ്ണന്‍, സുമാ കണ്ണന്‍, ബാലന്‍ മാറ്റര്‍, പി.കെ.സി റൗഫ് ഹാജി, ശരീഫ് മാടാപ്പുറം എന്നിവര്‍ സംസാരിച്ചു.