നാദാപുരം: മൊകേരി കോളജില്‍ ഇന്നലെയുണ്ടായ എസ്.എഫ്.ഐ അക്രമത്തില്‍ പരുക്കേറ്റ വിദ്യാര്‍ഥിയെ നാദാപുരം താലൂക്ക് ആശുപത്രിയില്‍ പ്രവേശിപ്പിച്ചു. അവസാന വര്‍ഷ ബി.എ ഇംഗ്ലിഷ് വിദ്യാര്‍ഥിയും എം.എസ്.എഫ് പ്രവര്‍ത്തകനുമായ കടമേരിയിലെ ഒതയോത്ത് ഹിജാസിനാണ് (21) മര്‍ദനമേറ്റത്. കോളജ് കോംപൗണ്ടില്‍ നില്‍ക്കുകയായിരുന്ന വിദ്യാര്‍ഥിയെ സംഘം ചേര്‍ന്നെത്തിയ എസ്.എഫ്.ഐ പ്രവര്‍ത്തകര്‍ അക്രമിക്കുകയായിരുന്നുവെന്ന് എം.എസ്.എഫ് ആരോപിച്ചു.
ആത്മരക്ഷാര്‍ഥം കോളജ് സ്റ്റാഫ് റൂമില്‍ കയറിയ ഹിജാസിനെ ഓഫിസ് തകര്‍ത്ത് ശേഷവും അക്രമിക്കുകയായിരുന്നു. ജനല്‍ ചില്ലുതട്ടി കഴുത്തിനു സമീപം മുറിവേറ്റിട്ടുണ്ട്. മറ്റു വിദ്യാര്‍ഥി സംഘടനകള്‍ക്കു പ്രവര്‍ത്തന സ്വാതന്ത്ര്യം നിഷേധിക്കുന്ന കോളജില്‍ യു.ഡി.എസ്.എഫ് പ്രവര്‍ത്തകരുടെ ഫ്‌ളെക്‌സുകള്‍ നിരന്തരം നശിപ്പിക്കുകയും പ്രവര്‍ത്തകര്‍ക്കു നേരെ ഭീഷണി നടത്തുന്നതും പതിവാണ്.