ചവറ: ക്രെയിനില്‍ നിന്നും ഓയില്‍ ചോര്‍ന്ന് ദേശീയപാതയില്‍ ഇടപ്പള്ളിക്കോട്ട ജങ്ഷനില്‍ മണിക്കൂറുകളോളം ഗതാഗതം തടസപ്പെട്ടു. റോഡില്‍ പരന്ന ഓയിലില്‍ തെന്നിവീണ് അപകടങ്ങള്‍ ഉണ്ടായതിനെ തുടര്‍ന്ന് ഫയര്‍ഫോഴ്‌സെത്തി റോഡ് വൃത്തിയാക്കി. ഇന്നലെ ഉച്ചക്ക് രണ്ടോടെയാണ് സംഭവം. ആലപ്പുഴയില്‍ നിന്നും തിരുവനന്തപുരത്തേക്ക് പോകുകയായിരുന്ന ക്രെയിനിന്റെ പൈപ്പ് പൊട്ടിയാണ് ഓയില്‍ ചോര്‍ന്നത്. ഏകദേശം ഇരുന്നൂറ് മീറ്ററോളം റോഡില്‍ പരന്ന ഓയിലില്‍ തെന്നി റോഡില്‍ വീണ് നാല് ബൈക്ക് യാത്രികര്‍ക്ക് നിസാര പരുക്കേറ്റിരുന്നു. തുടര്‍ന്ന് കരുനാഗപ്പള്ളിയില്‍ നിന്നും ചവറയില്‍ നിന്നും അസി.സ്റ്റേഷന്‍ ഓഫിസര്‍ പ്രസന്നകുമാറിന്റെ നേതൃത്വത്തില്‍ എത്തിയ ഫയര്‍ഫോഴ്‌സ് സംഘം റോഡ്  കഴുകി വൃത്തിയാക്കുകയും മുകളില്‍ മണ്ണിടുകയും ചെയ്യുകയായിരുന്നു. ഇതിന് ശേഷമാണ് ഗതാഗതം പുനഃസ്ഥാപിച്ചത്.