കൊണ്ടോട്ടി: തൊഴില്‍ തേടി അസമില്‍നിന്ന് ജയന്തന്‍ കേരളത്തിലേക്ക് വണ്ടികയറിയത് കടം വാങ്ങിയായിരുന്നു. എന്നാല്‍ ജയന്തന്റെ നാട്ടിലേക്കുള്ള മടക്കയാത്ര വിമാനത്തിലാണ്. തെരഞ്ഞെടുപ്പില്‍ വോട്ടുചെയ്യാന്‍ കൊച്ചിയില്‍നിന്ന് ഗോഹത്തിലേക്കാണ് ജയന്തനും കൂട്ടുകാരും പറന്നത്.

ജയന്തന്‍ മാത്രമല്ല കേരളത്തില്‍ തൊഴില്‍ തേടി വന്ന അന്യസംസ്ഥാന തൊഴിലാളികളില്‍ ഏറെ പേരും വോട്ട് ചെയ്യാന്‍ നാട്ടിലേക്ക് മടങ്ങുന്നത് ട്രെയിനിലേക്കാളേറെ വിമാനത്തിലാണ്. യാത്ര എങ്ങനെയായാലും ടിക്കറ്റ് നിരക്ക് നാട്ടിലെത്തിയാല്‍ പാര്‍ട്ടിക്കാര്‍ നല്‍കുമെന്ന ഉറപ്പുണ്ടെന്ന് കേരളത്തിന്റെ 'ഭായി'മാര്‍ ചിരിച്ചുകൊണ്ട് സമ്മതിക്കുന്നു. ഏതു പാര്‍ട്ടിക്കാരെന്ന് പറയാന്‍ അവര്‍ തയാറല്ല.

അസം, ബിഹാര്‍,ഒഡിഷ, പശ്ചിമ ബംഗാള്‍ തുടങ്ങിയ സംസ്ഥാനങ്ങളില്‍ ലോക്‌സഭാ തെരഞ്ഞെടുപ്പ് ഏപ്രില്‍ 11, 18, 23 തിയതികളിലാണ് നടക്കുന്നത്. സംസ്ഥാനത്ത് ജോലിചെയ്യുന്ന തൊഴിലാളികള്‍ ഏറെ പേരും വന്നെത്തുന്ന സംസ്ഥാനങ്ങളാണിവ. തൊഴിലാളികള്‍ കൂട്ടത്തോടെ വന്ന് വിമാന ടിക്കറ്റ് ബുക്ക് ചെയ്യുന്ന കാഴ്ചയാണുള്ളതെന്ന് ട്രാവല്‍ ഉടമകളും ടിക്കറ്റ് ഏജന്റുമാരും പറയുന്നു. കണക്്ഷന്‍ സര്‍വിസില്‍ ഡല്‍ഹിയിലേക്ക് ടിക്കറ്റെടുത്ത് പറക്കുന്നവരും കുറവല്ല.
ഒരാഴ്ചയായി കൊച്ചി- ബംഗളൂരു, ചെന്നൈ, ഗോഹട്ടി വിമാന സെക്ടറില്‍ 4,786 രൂപയാണ് നിരക്ക്. ഇത് 5,386 വരെ വര്‍ധിച്ചിട്ടുണ്ട്. അടുത്ത മാസത്തോടെ നിരക്ക് വീണ്ടും കൂടും. ട്രെയിനില്‍ രണ്ടുദിവസം യാത്ര ചെയ്യുന്നതിനു പകരം വിമാനത്തില്‍ മണിക്കൂറുകള്‍ കൊണ്ട് നാട്ടിലെത്താനാകുമെന്ന സന്തോഷത്തിലാണ് ഇതര സംസ്ഥാന തൊഴിലാളികള്‍. മിക്കവരും വിമാനത്തില്‍ ആദ്യമായി യാത്ര ചെയ്യുന്നവരാണ്.