തിരുവനന്തപുരം: മലപ്പുറം ലോക്‌സഭാ മണ്ഡലത്തിലെ ഉപതെരഞ്ഞെടുപ്പില്‍ സി.പി.എം മൃദു ഹിന്ദുത്വ സമീപനമാണ് സ്വീകരിച്ചതെന്ന് കെ.പി.സി.സി പ്രസിഡന്റ് എം.എം ഹസന്‍. ന്യൂനപക്ഷ ഏകീകരണം അവിടെ ഉണ്ടായെന്ന് തെരഞ്ഞെടുപ്പിനു ശേഷം സി.പി.എം നേതാക്കള്‍ പറയുന്നത് അതിനു തെളിവാണെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.
മന്ത്രി കടകംപള്ളി സുരേന്ദ്രന്‍ മലപ്പുറത്തെ ജനങ്ങളെ അപമാനിക്കുകയാണ് ചെയ്തത്. അദ്ദേഹം പ്രസ്താവന പിന്‍വലിച്ച് ജനങ്ങളോട് മാപ്പു പറയണം. ഇക്കാര്യത്തില്‍ സി.പി.എം നിലപാട് വ്യക്തമാക്കണം. കോണ്‍ഗ്രസിനെ ദുര്‍ബലമാക്കുകയും ബി.ജെ.പിയെ ശക്തിപ്പെടുത്തുകയും ചെയ്യുക എന്ന ലക്ഷ്യത്തോടെയാണ് സി.പി.എം നേതാക്കള്‍ ഇത്തരം പ്രസ്താവന നടത്തുന്നത്. ബി.ജെ.പിയെ നേരിടാന്‍ കോണ്‍ഗ്രസിന്റെ ആവശ്യമില്ലെന്ന മുഖ്യമന്ത്രി പിണറായി വിജയന്റെ പ്രസ്താവന പഴയ ജനസംഘം ബന്ധത്തിന്റെ ഓര്‍മകള്‍ കൊണ്ടുനടക്കുന്നതു കൊണ്ടാണ്. കേരളത്തില്‍ ഹിന്ദുത്വ ഫാസിസത്തെ നേരിടാന്‍ കോണ്‍ഗ്രസിനും യു.ഡി.എഫിനും മാത്രമേ സാധിക്കൂ. മലപ്പുറം തെരഞ്ഞെടുപ്പ് തെളിയിച്ചത് അതാണ്.
കോണ്‍ഗ്രസ് ബൂത്ത് കമ്മിറ്റികളുടെ രൂപീകരണം സംസ്ഥാനത്ത് മെയ് 10നകം പൂര്‍ത്തിയാകും. തൃശൂര്‍ ജില്ലയില്‍ രൂപീകരണം പൂര്‍ത്തിയായിട്ടുണ്ട്. മറ്റു ജില്ലകളില്‍ പല ഘട്ടങ്ങളിലാണ്. മെയ് 15 വരെ മെംബര്‍ഷിപ്പ് കാംപയിന്‍ നടക്കും. രണ്ടു ദിവസത്തിനകം സംസ്ഥാനത്തെ എല്ലാ ബൂത്ത് കമ്മിറ്റികള്‍ക്കും മെംബര്‍ഷിപ്പ് ബുക്ക് എത്തിക്കും. മെയ് 21ന് രാജീവ് ഗാന്ധിയുടെ രക്തസാക്ഷി ദിനം ആചരിക്കും. ചമ്പാരന്‍ സമരത്തിന്റെ 100-ാം വാര്‍ഷികം ഒരു വര്‍ഷം നീണ്ടുനില്‍ക്കുന്ന പരിപാടികളോടെ ആഘോഷിക്കുമെന്നും ഹസന്‍ വ്യക്തമാക്കി.