പീരുമേട്: വിവരാവകാശ നിയമപ്രകാരം നല്‍കിയ അപേക്ഷയ്ക്ക് വ്യക്തമായ മറുപടി നല്‍കാതിരുന്ന കൃഷി ഓഫീസറുടെ പക്കല്‍ നിന്നും പിഴ ഈടാക്കാന്‍ മുഖ്യ വിവരാവകാശ കമ്മീഷണറുടെ ഉത്തരവ്.
ഏലപ്പാറ കൃഷിഭവനിലെ മുന്‍ ഓഫീസര്‍ സി ഷെല്ലിയില്‍ നിന്നും 1000 രൂപ ഈടാക്കാനാണ് മുഖ്യ വിവരാവകാശ കമ്മീഷണര്‍ വിന്‍സന്‍ എം പോള്‍ ഉത്തരവിട്ടിരിക്കുന്നത്.
2016 ല്‍ ഏലപ്പാറയില്‍ നടന്ന ഓണചന്തയിലെ വിറ്റുവരവ് ഉള്‍പ്പെടെയുള്ള വിവരങ്ങള്‍ ലഭ്യമാക്കണമെന്ന് ആവശ്യപ്പെട്ട് ഏലപ്പാറ അതുല്യ നിവാസില്‍ എന്‍ കെ വല്‍സലന്‍ നല്‍കിയ അപേക്ഷയാണ് പബ്ലിക്ക് ഇന്‍ഫര്‍മേഷന്‍ ഓഫീസറായ കൃഷി ഓഫിസര്‍ അവ്യക്തമായ മറുപടി നല്‍കിയത്.
തുടര്‍ന്നു ഇതു ചൂണ്ടിക്കാട്ടി വല്‍സലന്‍ സംസ്ഥാന വിവരാവകാശ കമ്മീഷണര്‍ക്ക് അപ്പീല്‍ നല്‍കുകയായിരുന്നു.ഇരു വിഭാഗത്തിന്റെയും വാദങ്ങള്‍ കേട്ട ശേഷം പിഴ ഈടാക്കാന്‍ ഉത്തരവിടുകയായിരുന്നു.