കായംകുളം: സ്വാതന്ത്ര്യ സമര സേനാനിയും വിപ്ലവകാരിയും സാഹിത്യകാരനുമായിരുന്ന പുതുപ്പള്ളി രാഘവന്റെ പേരില്‍ പുതുപ്പള്ളി രാഘവന്‍ ഫാമിലി ട്രസ്റ്റ് ഏര്‍പ്പെടുത്തിയ സാമൂഹ്യ രാഷ്ട്രീയ രംഗത്തെ മികവുറ്റ വ്യക്തിത്വത്തിനു നല്‍കുന്ന പുരസ്‌കാരം ഈ വര്‍ഷം മന്ത്രി വി.എസ്.സുനില്‍കുമാറിന് സമ്മാനിക്കുമെന്ന് ട്രസ്റ്റ് ചെയര്‍പേഴ്‌സണ്‍ ഷീലാ രാഹുല്‍, അഡ്വ.എ.ഷാജഹാന്‍, തുടങ്ങിയവര്‍ പത്രസമ്മേള ന ത്തില്‍ അറിയിച്ചു. 27 ന് രാവിലെ 10ന് പുതുപ്പള്ളിയിലെ സ്മൃതി മണ്ഡപത്തില്‍ നടക്കുന്ന ചടങ്ങില്‍ മുന്‍ മന്ത്രി പി.കെ.ഗുരുദാസന്‍ പുരസ്‌കാരം സമ്മാനിക്കും. 25000 രൂപയും ശില്‍പ്പവുമാണ് പുരസ്‌കാരം . ഡോ.പുതുശേരി രാമചന്ദ്രന്‍, ഷീല രാഹുല്‍, ഷാജി ശര്‍മ്മ, ഗീത നസീര്‍, ഇ.എം.സതീശന്‍ എന്നിവരടങ്ങിയ കമ്മിറ്റിയാണ് അവാര്‍ഡ് ജേതാവിനെ തെരെഞ്ഞെടുത്തത്. കാര്‍ഷിക മേഖലയിലെ വിവിധ പ്രവര്‍ത്തനങ്ങള്‍ പരിഗണിച്ചാണ് പുരസ്‌കാരം നല്‍കുന്നത്. യോഗത്തില്‍ യു.പ്രതിഭാഹരി എം.എല്‍.എ.അധ്യക്ഷയായി. പുസ്തക പ്രകാശനം ഇ.എം. രാധക്ക് നല്‍കി മീഡിയ അക്കാഡമി ചെയര്‍മാന്‍ ആര്‍.എസ്.ബാബു നിര്‍വഹിക്കും.