കൊച്ചി: പെരിയാര്‍ സംരക്ഷണത്തിന് പ്രത്യേക അധികാരങ്ങളോടുകൂടിയ പെരിയാര്‍ റിവര്‍ അതോറിറ്റിക്ക് രൂപം കൊടുക്കാന്‍ സര്‍ക്കാര്‍ നടപടിയെടുക്കണമെന്ന് സി.പി.ഐ ജില്ലാ എക്‌സിക്യൂട്ടീവ് യോഗം ആവശ്യപ്പെട്ടു.244 കിലോമീറ്റര്‍ ദൈര്‍ഘ്യമുള്ള പെരിയാര്‍ ജില്ലയിലെ പ്രധാന  ശുദ്ധജലസ്രോതസ്സും കാര്‍ഷിക, വ്യാവസായിക വികസനത്തിന് നിര്‍ണ്ണായക സംഭാവന നല്‍കുന്നതുമാണ്. ജൈവരാസമാലിന്യങ്ങളും, മനുഷ്യവിസര്‍ജ്ജന മാലിന്യങ്ങളും അനുവദനീയമായ അളവില്‍ കൂടാതിരിക്കാന്‍ ജാഗ്രതയോടെ മലിനീകരണ ബോര്‍ഡും സര്‍ക്കാര്‍ സംവിധാനങ്ങളും ഉണര്‍ന്നു പ്രവര്‍ത്തിക്കണം. പെരിയാറിന്റെ ഇരുകരകളിലും ചെറുതും വലുതുമായ കയ്യേറ്റങ്ങള്‍ തടയേണ്ടതുണ്ട്. പെരിയാറിലെ വിഷജലമാണ് വാട്ടര്‍ അതോറിറ്റി വിതരണം ചെയ്യുന്നതുമെന്നുമുള്ള കള്ളപ്രചരണം നടത്തുന്ന സംഘടനകളെ സര്‍ക്കാര്‍ നിയന്ത്രിക്കണം.വ്യവസായശാലകള്‍ ഒരു നിമിഷംകൊണ്ട് അടച്ചുപൂട്ടണം എന്ന് പറയുന്നത് യുക്തിരഹിതവും വികസനവിരുദ്ധമാണ്. നിലവിലെ മലിനീകരണ നിയമങ്ങള്‍ക്കും വ്യവസായ നിയമങ്ങള്‍ക്കും വിധേയമായി പരിസ്ഥിതി ആഘാതം തടയുക എന്ന സമീപനമാണ് ക്രിയാത്മകമായി ഉണ്ടാവേണ്ടത്. ശാസ്ത്രീയ പഠനങ്ങള്‍ക്കുശേഷം പെരിയാറിന്റെ നീരൊഴുക്ക് വീണ്ടെടുക്കാന്‍ ആവശ്യമായ നടപടികളാണ് വേണ്ടത്. കയ്യേറ്റങ്ങള്‍ തടഞ്ഞും മാലിന്യങ്ങള്‍ നിര്‍മാര്‍ജനം ചെയ്തും പെരിയാറിനെ സംരക്ഷിക്കാന്‍ പെരിയാര്‍ റിവര്‍ അതോറിറ്റിക്ക് രൂപം നല്‍കണമെന്ന് യോഗം സര്‍ക്കാരിനോട് ആവശ്യപ്പെട്ടു.കെ.എന്‍ ഗോപി അധ്യക്ഷത വഹിച്ച യോഗത്തില്‍ ജില്ലാ സെക്രട്ടറി പി രാജു റിപ്പോര്‍ട്ട് അവതരിപ്പിച്ചു. അസിസ്റ്റന്റ് സെക്രട്ടറിമാരായ കെ.എം ദിനകരന്‍, അഡ്വ.കെ.എന്‍ സുഗതന്‍, കമല സദാനന്ദന്‍, കെ.കെ അഷറഫ്, ഇ.കെ ശിവന്‍, എം.ടി നിക്‌സന്‍, ടി.സി സന്‍ജിത്ത് എന്നിവര്‍ പ്രസംഗിച്ചു.