ഹൈദരാബാദ്: ഈസ്റ്റര്‍ ദിനത്തില്‍ വിമാനം തട്ടിക്കൊണ്ടു പോകുമെന്ന് മുംബൈ പൊലിസ് ചീഫിന് ഇ- മെയില്‍ സന്ദേശമയച്ചയാള്‍ അറസ്റ്റില്‍. ഹൈദരാബാദിലെ ട്രാന്‍സ്‌പോര്‍ട്ട് എജന്റ് വംശി കൃഷ്ണയെയാണ് പൊലിസ് അറസ്റ്റ് ചെയ്തത്. ഹൈദരാബാദില്‍ നിന്നുള്ള സ്ത്രീയാണെന്ന് വെളിപ്പെടുത്തിയാണ് ഇയാള്‍ സന്ദേശമയച്ചത്. തുടര്‍ന്ന് ഹൈദരാബാദ്, മുംബൈ, ചെന്നൈ വിമാനത്താവളങ്ങളില്‍ അതിജാഗ്രതാ നിര്‍ദേശം നല്‍കിയിരുന്നു.
അതേസമയം സംഭവത്തിന് പിന്നില്‍ രസകരമായ കാര്യങ്ങളാണുള്ളതെന്ന് ഹൈദരാബാദ് പൊലിസ് വെളിപ്പെടുത്തി. കാമുകിയുടെ പ്രീതിക്കായാണ് ഇയാള്‍ സന്ദേശമയച്ചതെന്ന് പൊലിസ് പറഞ്ഞു. അവധിക്കാലം ചെലവഴിക്കാന്‍ ഗോവയ്ക്ക് പോകുന്നതിനായി ചെന്നൈയില്‍ നിന്ന് മുംബൈയിലേക്കുള്ള വിമാന ടിക്കറ്റ് എടുത്തു തരണമെന്ന് കാമുകി ആവശ്യപ്പെട്ടതിനെ തുടര്‍ന്നാണ്ഇയാള്‍ ഇത്രയും സാഹസം കാണിച്ചത്. സോഷ്യല്‍ മീഡിയയില്‍ ധനികനായ ബിസിനസുകാരനാണെന്നായിരുന്നു ഇയാള്‍ സൂചിപ്പിച്ചിരുന്നത്. എന്നാല്‍ കാമുകിയുടെ ആവശ്യം സാധിക്കാനുള്ള പണം ഇയാളുടെ കൈവശമില്ലായിരുന്നു. പല തവണ കാമുകിയുടെ യാത്ര മുടക്കാന്‍ ശ്രമിച്ചെങ്കിലും അവര്‍ ആവശ്യം ആവര്‍ത്തിച്ചതോടെയാണ് ഇയാള്‍ പൊലിസ് മേധാവിക്ക് ഇമെയില്‍ സന്ദേശമയച്ചത്. കാമുകിക്കായി വ്യാജ വിമാനടിക്കറ്റ് നല്‍കാനായിരുന്നു ആദ്യം ശ്രമിച്ചത്. എന്നാല്‍ പിടിക്കപ്പെട്ടാല്‍ ഇവര്‍ തന്നെ ഉപേക്ഷിച്ച് പോകുമെന്ന് കരുതി പദ്ധതി ഉപേക്ഷിക്കുകയായിരുന്നു.
ഇതിനായി ഇയാള്‍ വ്യാജ ഇ-മെയില്‍ അക്കൗണ്ട് ഉണ്ടാക്കി.അജ്ഞാതരായ ആറുപേര്‍ റെസ്റ്റോറന്റില്‍ വച്ച് വിമാനം തട്ടിക്കൊണ്ടു പോകുന്നതിനെ കുറിച്ച് സംസാരിക്കുന്നത് ശ്രദ്ധയില്‍ പെട്ടുവെന്നും 23 അംഗ സംഘം മൂന്നു ഗ്രൂപ്പുകളായി തിരിഞ്ഞാണ് സംഭവം ആസൂത്രണം ചെയ്തതെന്നും ഇയാള്‍ സന്ദേശത്തില്‍ പറയുന്നു. ഇതേ തുടര്‍ന്ന് മുംബൈ പൊലിസ് കമ്മിഷനര്‍ സംഭവത്തെ കുറിച്ച് അന്വേഷിക്കാന്‍ ഹൈദരാബാദ ്‌പൊലിസിനോട് ആവശ്യപ്പെടുകയായിരുന്നു. ഇ-മെയിലിന്റെ ഐ.പി വിലാസം പിന്തുടര്‍ന്നാണ് പൊലിസ് ഇയാളെ അറസ്റ്റ് ചെയ്തത്.