ഈരാറ്റുപേട്ട: ഐ.എസിന്റെ ആശയങ്ങള്‍ തികച്ചും ഇസ്‌ലാമിക വിരുദ്ധമാണെന്ന് എസ്.വൈ.എസ് സംസ്ഥാന സെക്രട്ടറി അബ്ദുസ്സമദ് പൂക്കോട്ടൂര്‍ .
ഇത്തരം ആശയങ്ങള്‍ക്കെതിരെ ഒറ്റക്കെട്ടായി പ്രതികരിക്കണമെന്ന് അദ്ദേഹം ആഹ്വാനം ചെയ്തു. പ്രവാസി ലീഗ് ഈരാറ്റുപേട്ട മുനിസിപ്പല്‍ കമ്മറ്റി സംഘടിപ്പിച്ച ഹജ്ജ് പഠന ക്ലാസില്‍ സംസാരിക്കുകയായിരുന്നു അദ്ദേഹം.
ജൂദന്റെ സൃഷ്ടിയാണ് ഐ.എസ് എന്ന് സംശയിക്കേണ്ട എല്ലാ തെളിവുകളും പുറത്തുവന്നുകൊണ്ടിരിക്കുന്നു. ഇവര്‍ക്ക് ആയുധങ്ങള്‍ അടക്കം നല്‍കി സംരക്ഷിക്കുന്നത് ഇസ്രായേലാണെന്നും വിശ്വാസികള്‍ കരുതിയിരിക്കണമെന്നും അദ്ദേഹം പറഞ്ഞു.
ബാധ്യത നിര്‍വഹിക്കാത്ത ആത്മീയത കപട ആത്മീയതയാണ്. അമിത ആത്മീയതയും ആപത്താണ്. ഏക സിവില്‍ കോഡ് ഇന്ത്യയില്‍ അപകടമാണ്. ഏക ദൈവ വിശ്വാസം ഊട്ടിയുറപ്പിക്കുകയാണ് ഹജ്ജിന്റെ പരമപ്രധാന ലക്ഷ്യമെന്നും അദ്ദേഹം പറഞ്ഞു. രണ്ടര മണിക്കൂര്‍ നീണ്ടുനിന്ന പ്രൗഢഗംഭീര ഹജ്ജ് ക്ലാസില്‍ സ്തീകളടക്കം നിരവധിപ്പേര്‍ പങ്കെടുത്തു.
പ്രവാസി ലീഗ് കോട്ടയം ജില്ലാ പ്രസിഡന്റ് ഇബ്രാഹിം വലിയവീട്ടില്‍ അധ്യക്ഷത വഹിച്ചു. മുസ്‌ലിം ലീഗ് കോട്ടയം ജില്ലാ പ്രസിഡന്റ് പി.എം ഷെറീഫ് ഉദ്ഘാടനം നിര്‍വഹിച്ചു. ഇമാം കൗണ്‍സില്‍ ചെയര്‍മാന്‍ മുഹമ്മദ് നദീര്‍ മൗലവി, പി.എം അബ്ദുല്‍ ഖാദര്‍, എം.എ ബഷീര്‍, സുബൈര്‍ മൗലവി, സി ബി ബാസിത്, പി.എസ് അബ്ദുല്‍ ജബ്ബാര്‍, പി ഇ ഹുസൈന്‍, റഷീദ് വലിയവീട്ടില്‍, കെ എ എം ഷെറീഫ് സംബന്ധിച്ചു.