ന്യൂഡല്‍ഹി: ഇന്ത്യന്‍ അതിര്‍ത്തിക്ക് സമീപം നാല് പാകിസ്താന്‍ പോര്‍വിമാനങ്ങള്‍ പറന്നതായി റിപ്പോര്‍ട്ട്. പഞ്ചാബിലെ ഖേംകരണിനോടടുത്ത അതിര്‍ത്തി പ്രദേശങ്ങളിലാണ് പാകിസ്താന്റെ നാല് അമേരിക്കന്‍ നിര്‍മിത എഫ്-16 പോര്‍വിമാനങ്ങള്‍ ഇന്ത്യന്‍ അതിര്‍ത്തി ലക്ഷ്യമാക്കി കടന്നുവന്നത്. ഇന്ത്യന്‍ നാവികസേനയുടെ റഡാറില്‍ സന്ദേശം ലഭിച്ചതിനെ തുടര്‍ന്ന് നാവികസേന സുഖോയ് 30എംകെഐ, മിറാഷ് 2000 പോര്‍വിമാനങ്ങള്‍ രംഗത്തിറക്കിയതോടെ പാക് വിമാനങ്ങള്‍ തിരിച്ചു പറക്കുകയായിരുന്നു എന്ന് അധികൃതര്‍ അറിയിച്ചു.

കഴിഞ്ഞ രണ്ടു മാസത്തിനിടെ നിരവധി പാകിസ്താന്‍ ഡ്രോണ്‍ വിമാനങ്ങളെ ഇന്ത്യന്‍ നാവികസേന വെടിവെച്ചുവീഴ്ത്തിയിരുന്നു. ഈ അടുത്താണ് പാകിസ്താന്‍ ഡ്രോണ്‍ വിമാനങ്ങളെ പിന്തുടര്‍ന്നു തുരത്തുന്നതിനിടെ ഇന്ത്യയുടെ മിഗ് -21 പോര്‍വിമാനത്തെ പാകിസ്താന്റെ എഫ്-16 വിമാനം വെടിവെച്ചിടുകയും പൈലറ്റ് വ്യോമസേന വിങ് കമാന്‍ഡര്‍ അഭിനന്ദന്‍ വര്‍ധമാനെ പാകിസ്താന്‍ തടവിലാക്കുകയും പിന്നീട് ഇന്ത്യക്ക് കൈമാറുകയും ചെയ്തിരുന്നത്.