ഫറോക്ക്: ഐ.ഒ.സി ഡിപ്പോയ്ക്കു സമീപം പാതയോരത്തെ കെട്ടിടത്തിനരികില്‍ സൂക്ഷിച്ച പ്ലാസ്റ്റിക് മാലിന്യങ്ങളില്‍ നിന്നും തീ പടര്‍ന്ന് സമീപത്തെ ചായക്കട കത്തി നശിച്ചു. പുറ്റെക്കാട് കാക്കൂല്‍ ഹംസയുടെ ചായക്കടയാണ് കത്തി നശിച്ചത്. 50,000 രൂപയുടെ നഷ്ടം കണക്കാക്കുന്നു. ഐ.ഒ.സി ഡിപ്പോയില്‍ ലോറി പാര്‍ക്കിങ് ഗ്രൗണ്ടിനോടു ചേര്‍ന്നായിരുന്നു അഗ്നിബാധ. സമീപത്തെ സ്ഥാപനത്തിലുളളവര്‍ കടയ്ക്കു സമീപം കൊണ്ടിട്ട പ്ലാസ്റ്റിക് കവറുകള്‍ക്കാണ് വൈകിട്ട് 4.30 ഓടെ തീപിടിച്ചത്. കാറ്റില്‍ ആളിക്കത്തിയ തീ ചായക്കടയുടെ മേല്‍ക്കൂരയിലേക്ക് പടരുകയായിരുന്നു. ജീവനക്കാര്‍ ഐ.ഒ.സി ഡിപ്പോയിലെ അഗ്നിരക്ഷാ സംവിധാനം ഉപയോഗിച്ചു തീ അണയ്ക്കാന്‍ ശ്രമം നടത്തി. തുടര്‍ന്ന് മീഞ്ചന്തയില്‍ നിന്നും സ്‌റ്റേഷന്‍ ഓഫിസര്‍ പി.വി വിശ്വാസിന്റെ നേതൃത്വത്തില്‍ എത്തിയ അഗ്നിശമന സേന തീ അണക്കുകയായിരുന്നു.
ബേപ്പൂര്‍: ആര്‍.എം ഹോസ്പിറ്റലിന് എതിര്‍വശത്ത് താമസിക്കുന്ന എ.ഗോപാലന്റെ വീട്ടിലെ വിറകു പുരയക്ക് തീപിടിച്ചു. ഇന്നലെ രാത്രി 9.15 ഓടെയാണ് സംഭവം. വീട്ടുകാരെല്ലാം ടൂര്‍ പോയതിനാല്‍ ഗോപാലന്‍ വീട്ടില്‍ തനിച്ചായിരുന്നു. സംഭവം ശ്രദ്ധയില്‍പ്പെട്ടതിനെ തുടര്‍ന്ന് നാട്ടുകാരോടൊപ്പം വീട്ടിലെ പമ്പ് ഉപയോഗിച്ച് തീയണക്കുകയായിരുന്നു. മീഞ്ചന്ത ഫയര്‍ സറ്റേഷനില്‍ നിന്നും ലീഡിംങ്ങ് ഫയര്‍മാന്‍ സി. മുകുന്ദന്റെ നേതൃത്വത്തില്‍ ഒരു യൂനിറ്റും സംഭവസ്ഥലത്തെത്തിയിരുന്നു. 10,000 രൂപയുടെ നഷ്ടം സംഭവിച്ചതായി കണക്കാക്കുന്നു.