ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ കിരീടത്തിന് ഒരു ജയം മാത്രം അകലെയെത്തി ലിവര്‍പൂള്‍. കഴിഞ്ഞ ദിവസം നടന്ന മത്സരത്തില്‍ എതിരില്ലാത്ത നാല് ഗോളിന് ക്രിസ്റ്റല്‍ പാലസിനെ തകര്‍ത്തതോടെയാണ് ലിവര്‍പൂള്‍ കിരീടത്തിലേക്ക് വീണ്ടും അടുത്തത്.
അലക്‌സാണ്ടര്‍ അര്‍നോള്‍ഡ്, മുഹമ്മദ് സലാഹ്, ഫാബിഞ്ഞോ, സാദിയോ മാനേ എന്നിവരാണ് ലിവര്‍പൂളിന് വേണ്ടി ഗോള്‍ സ്വന്തമാക്കിയത്. 31 മത്സരത്തില്‍ നിന്ന് 86 പോയിന്റാണ് ഇപ്പോള്‍ ലിവര്‍പൂളിനുള്ളത്.
30 മത്സരത്തില്‍ നിന്ന് 63 പോയിന്റുമായി സിറ്റി രണ്ടാം സ്ഥാനത്തുമുണ്ട്. ജൂലൈ മൂന്നിന് മാഞ്ചസ്റ്റര്‍ സിറ്റിയുമായിട്ടാണ് ലിവര്‍പൂളിന്റെ അടുത്ത മത്സരം. കഴിഞ്ഞ ദിവസം നടന്ന മറ്റൊരു മത്സരത്തില്‍ എതിരില്ലാത്ത ഒരു ഗോളിന് വോള്‍വ്‌സ് ബേണ്‍മൗത്തിനെ പരാജയപ്പെടുത്തി.
എവര്‍ട്ടണ്‍ ഒരു ഗോളിന് നോര്‍വിച്ച് സിറ്റിയേയും പരാജയപ്പെടുത്തി. തോറ്റതോടെ ഈ സീസണില്‍ നോര്‍വിച്ച് സിറ്റി തരംതാഴ്ത്തുമെന്ന കാര്യം ഉറപ്പായി.