മാഡ്രിഡ്: അത്‌ലറ്റികോ മാഡ്രിഡ് താരം അന്റോയിന്‍ ഗ്രീസ്മാന്‍ എങ്ങോട്ടും പോകുന്നില്ലെന്ന് ക്ലബ് പ്രസിഡന്റ് സിറെസോ. ഈ വരുന്ന സമ്മര്‍ ട്രാന്‍സ്ഫര്‍ വിന്‍ഡോയില്‍ ഗ്രീസ്മാന്‍ ടീം വിടാന്‍ ശ്രമിക്കുമെന്ന വാര്‍ത്തകള്‍ക്കിടയിലാണ് ക്ലബ് പ്രസിഡന്റിന്റെ പ്രതികരണം. ഗ്രീസ്മാന്‍ ക്ലബ് വിടാന്‍ ഒരു സാധ്യതയുമില്ലെന്നും താരം ക്ലബില്‍ തന്നെ തുടരുമെന്ന് തനിക്ക് ഉറപ്പാണെന്നും അത്‌ലറ്റികോ മാഡ്രിഡ് പ്രസിഡന്റ് പറഞ്ഞു. ഈ ട്രാന്‍സ്ഫര്‍ വിന്‍ഡോയില്‍ ബാഴ്‌സലോണയിലേക്കോ സിദാന്റെ റയല്‍ മാഡ്രിഡിലേക്കോ ഗ്രീസ്മാന്‍ മാറുന്നെന്ന വാര്‍ത്തയുണ്ടായിരുന്നു. ഇതിനെതിരേയായിരുന്നു പ്രസിഡന്റിന്റെ പ്രതികരണം. 2023 വരെ ക്ലബില്‍ കരാര്‍ ഉള്ള ഗ്രീസ്മാന്‍ അത്‌ലറ്റികോ മാഡ്രിഡില്‍ തന്നെ തുടരുമെന്ന് എനിക്കുറപ്പുണ്ടെന്നും പ്രസിഡന്റ് കൂട്ടിച്ചേര്‍ത്തു. ലോകകപ്പിന് മുന്‍പും ഗ്രീസ്മാന്‍ ബാഴ്‌സലോണയിലേക്കെന്ന തരത്തില്‍ വാര്‍ത്തകള്‍ പ്രചരിച്ചിരുന്നു. ഇതിനെതിരേ ഗ്രീസ്മാന്‍ തന്നെ രംഗത്ത് വന്നിരുന്നു. എന്നാല്‍ നിലവിലെ ട്രാന്‍സ്ഫര്‍ വിഷയത്തില്‍ ഗ്രീസ്മാന്‍ പ്രതികരിച്ചിട്ടില്ല.