ഭോപ്പാൽ: രാജ്യത്ത് ജയ് ശ്രീ രാം വിളിക്കാൻ ആവശ്യപ്പെട്ട് വീണ്ടും തീവ്ര ഹിന്ദുത്വവാദികളുടെ അഴിഞ്ഞാട്ടം. മധ്യപ്രദേശിലെ  രത്‌ലമിൽ മൂന്ന് മുസ്ലിം കുട്ടികളെ  ഹിന്ദുത്വവാദികളായ സംഘം തല്ലിച്ചതച്ചു .രത്‌ലമിലെ അമൃത്സാഗർ തലബിൽ നടന്ന   സംഭവത്തിൻ്റെ വീഡിയോ വ്യാഴാഴ്ച മുതൽ ആണ് സോഷ്യൽ മീഡിയയിൽ വൈറലായത്. ഒഴിവ് സമയത്ത് കളിക്കുക ആയിരുന്ന 12, 13 വയസ്സുള്ള കുട്ടികളുടെ അടുത്തേക്ക് രണ്ട് പേർ വന്ന് ആണ് ആക്രമണം തുടങ്ങിയത്. മതപരമായി ആക്ഷേപിക്കുന്നതും പരിഹസിക്കുന്നതും വീഡിയോയിൽ കാണാം.

മർദനം തുടങ്ങിയതോടെ 13 കാരൻ അല്ലാഹ്... എന്നു ഉറക്കെ നിലവിളിച്ചു. ഇതോടെ ആക്രമണം ശക്തമായി. ജയ് ശ്രീ രാം വിളിക്കാനും ആവശ്യപ്പെട്ടു. ഇല്ലെങ്കിൽ സമീപത്തെ കുളത്തിൽ എറിഞ്ഞു കൊല്ലും എന്നും ഭീഷണിപ്പെടുത്തി. തുടർന്നും മുഖത്ത് ഉൾപ്പെടെ മർദിക്കുന്നതും ചവിട്ടുന്നതും വീഡിയോയിൽ കാണാം. കൊച്ചുകുട്ടികൾ നിലവിളിക്കുമ്പോൾ അക്രമികൾ ആസ്വദിക്കുന്നതും വീഡിയോയിൽ ഉണ്ട്.

സംഭവത്തിൽ വലിയ പ്രതിഷേധം ആണ് ഉയരുന്നത്.  പ്രദേശത്തെ നിരവധി ആളുകൾ മനക് ചൗക്ക് പോലീസ് സ്റ്റേഷനിലെത്തി പ്രതികൾക്ക് എതിരെ നടപടിയെടുക്കണമെന്നാവശ്യപ്പെട്ട് പ്രതിഷേധ പ്രകടനം നടത്തി. സംഭവത്തിൻ്റെ വീഡിയോ പ്രചരിച്ചതോടെ മധ്യപ്രദേശ് പോലിസ് ഇടപെട്ടു. രത്‌ലമിൽ മൂന്ന് കുട്ടികളെ മർദിക്കുകയും 'ജയ് ശ്രീറാം' വിളിക്കാൻ നിർബന്ധിക്കുകയും ചെയ്ത പ്രതികളെ കണ്ടെത്താനുള്ള ശ്രമത്തിൽ ആണെന്ന്  പോലീസ്  വാർത്താക്കുറിപ്പിൽ അറിയിച്ചു. പ്രതികളെ തിരിച്ചറിഞ്ഞിട്ടില്ല.

Clip of three Muslim children being bashed & being forced to chant ‘Jai Shri Ram’ now going viral in Bangladesh…. With calls for UN Peacekeepers being sent to India to protect minority community in the country.🤦🏻 pic.twitter.com/NQ22cTtdue

— The DeshBhakt 🇮🇳 (@TheDeshBhakt) December 6, 2024

കണ്ടാൽ അറിയുന്ന രണ്ട് പേർക്കെതിരെ  കേസെടുത്തിട്ടുണ്ടെന്ന് രത്‌ലം അഡീഷണൽ എസ്‌.പി രാകേഷ് ഖാഹ പറഞ്ഞു.
ആക്രമണം, അധിക്ഷേപം, വധഭീഷണി, മതവികാരം വ്രണപ്പെടുത്തൽ തുടങ്ങിയ കുറ്റങ്ങൾക്ക് രണ്ട് അജ്ഞാതർക്കെതിരെ എഫ്ഐആർ രജിസ്റ്റർ ചെയ്തിട്ടുണ്ട്. സംഭവത്തെക്കുറിച്ച് വിശദമായി അന്വേഷിക്കാനും കുറ്റവാളികളെ കണ്ടെത്താനും സൈബർ ഉദ്യോഗസ്ഥർ ഉൾപ്പെടെയുള്ള പ്രത്യേക സംഘത്തെ  രൂപീകരിച്ചിട്ടുണ്ട്- അദ്ധേഹം അറിയിച്ചു.