ഓര്‍മകളുടെ വിരല്‍തുമ്പില്‍നിന്ന്

ഏതു കയത്തിലേക്കാണു നീ ഊര്‍ന്നിറങ്ങിയത്?
വാക്കും വരയും തീര്‍ത്ത ചിത്രങ്ങളും മാഞ്ഞു പോയല്ലോ!
മഴ വന്നതും
വെയില്‍ മാറിയതും
ആരുടെയും ആഗ്രഹങ്ങള്‍ക്കനുസരിച്ചല്ല!
കത്തുന്ന വേനലും
മഴയുടെ വളക്കിലുക്കങ്ങളും
താണ്ടി
വാക്കുകള്‍ മറന്നുവച്ച
മരത്തണലുകളില്‍
ഒന്നുകൂടി പോയി പരതി
നോക്കണം.
പങ്കു പറ്റിയ സൗഹൃദങ്ങളത്രയും
മഴവില്ലഴകിനോടൊപ്പം
ഇത്ര വേഗം മാഞ്ഞുപോകയോ?
ആകാശങ്ങള്‍ പോലെ,
ആഴികള്‍ പോലെ,
ആഗ്രഹങ്ങള്‍ക്കും
അതിരുകളുണ്ടെന്നത്
പുതിയ കണ്ടെത്തലായി
രേഖപ്പെടുത്തിവയ്ക്കാം.