കണ്ണൂര്‍: കണ്ണൂര്‍ വിമാനത്താവളത്തില്‍ നിന്നു ഡല്‍ഹിയിലേക്കു നേരിട്ട് വിമാന സര്‍വിസ് തുടങ്ങി. തിങ്കള്‍, വ്യാഴം ഒഴികെയുള്ള ദിവസങ്ങളിലാണ് ഡല്‍ഹിയിലേക്ക് എയര്‍ഇന്ത്യ വിമാന സര്‍വിസ് നടത്തുക. ഡല്‍ഹിയിലേക്കുള്ള എയര്‍ഇന്ത്യയുടെ വിമാനസര്‍വിസ് ഉച്ചയ്ക്ക് 3.30ന് പുറപ്പെട്ട് 6.45ന് എത്തും. കോഴിക്കോട്ടേക്ക് ഉച്ചയ്ക്ക് ഒന്നിന് പുറപ്പെട്ട് 1.30ന് എത്തും. ഡല്‍ഹിയില്‍ നിന്നു 9.05ന് പുറപ്പെട്ട് ഉച്ചയ്ക്ക് 12.15ന് എയര്‍ഇന്ത്യ കണ്ണൂരിലെത്തും. ഉച്ചയ്ക്ക് 2.15ന് കോഴിക്കോട് നിന്നു പുറപ്പെട്ട് 2.45ന് കണ്ണൂരിലെത്തിയ ശേഷമാണു 3.30ന് ഡല്‍ഹിക്കു തിരിക്കുന്നത്. കോഴിക്കോട്, കണ്ണൂര്‍ വിമാനത്താവള യാത്രക്കാരെ ലക്ഷ്യമിട്ടാണ് എയര്‍ഇന്ത്യ സര്‍വിസ് തുടങ്ങിയത്.
എയര്‍ ഇന്ത്യ ഡല്‍ഹി സര്‍വിസ് എം.ഡി വി. തുളസീദാസ് ഉദ്ഘാടനം ചെയ്തു. കിയാല്‍ സി.ഒ.ഒ ഉത്പല്‍ ബറുവ, എയര്‍ ഇന്ത്യ തിരുവനന്തപുരം മാനേജര്‍ ജേക്കബ്, കണ്ണൂര്‍ സ്റ്റേഷന്‍ മാനേജര്‍ സുധ പങ്കെടുത്തു. ഉദ്ഘാടനത്തോടനുബന്ധിച്ച് ആദ്യ യാത്രക്കാര്‍ക്കു മധുരവും സമ്മാനിച്ചു. 31 മുതല്‍ കൊച്ചി, തിരുവനന്തപുരം എന്നിവിടങ്ങളിലേക്ക് ഇന്‍ഡിഗോ വിമാന സര്‍വിസ് തുടങ്ങിയിരുന്നു. കൊച്ചിയിലേക്കു രണ്ടും തിരുവനന്തപുരത്തേക്ക് ഒരുവിമാന സര്‍വിസിനുമാണ് സ്വകാര്യ കമ്പനിയായ ഇന്‍ഡിഗോ തുടക്കമിട്ടത്.