മണ്ണഞ്ചേരി: ഫോര്‍മലിന്‍ പരിശോധന കര്‍ശനമായതോടെ ജില്ലയില്‍ എത്തിയിരുന്ന കരിമീന്റെ വരവും പൂര്‍ണമായും നിലച്ചു. ഇതര സംഥാനങ്ങളില്‍ നിന്നും എത്തിയിരുന്ന ആയിരക്കണക്കിന് ടണ്‍ കടല്‍ മത്സ്യങ്ങളുടെ വരവ് നിലച്ചതിന് പിന്നാലെയാണ് കായല്‍ മത്സ്യത്തിന്റെ വരവും അവസാനിച്ചത്. ദിനംപ്രതി ആയിരക്കണക്കിന് കിലോഗ്രാം കരിമീനുകളാണ് ഇതര സംസ്ഥാനങ്ങളില്‍ നിന്നും വിവിധ ഏജന്‍സികള്‍ വഴി ആലപ്പുഴയിലെ വിപണിയിലെത്തിയിരുന്നത്.
ആലപ്പുഴ,ചേര്‍ത്തല,കായംകുളം റെയില്‍വേ സ്റ്റേഷനുകളിലാണ് ഇവയില്‍ ഭൂരിഭാഗം മത്സ്യങ്ങളുടേയും വിപണനകേന്ദ്രമായി വര്‍ത്തിച്ചിരുന്നത്. ഇവിടങ്ങളില്‍ പരിശോധനയ്ക്ക് നിര്‍ദേശം നല്‍കിയതോടെയാണ് ഇത്തരം കേന്ദ്രങ്ങളിലേക്കുള്ള മീന്‍ വരവ് നിലച്ചതെന്നാണ് കരുതുന്നത്. ഹോട്ടലുകളിലും വഞ്ചിവീടുകളിലും വിവാഹ - വിനോദ സല്‍ക്കാരങ്ങളിലും ജില്ലയില്‍ കരിമീന് നല്ല പ്രിയമാണുള്ളത്.ഇത് മുതലാക്കിയാണ് ഇതര സംസ്ഥാന കരിമീന്‍ വില്‍പ്പന ജില്ലയില്‍ സജീവമായത്.
കേരളത്തിലെ കായലുകളില്‍ നിന്നും ലഭിക്കുന്ന രുചികരമായ കരിമീനുകള്‍ക്ക് നല്ല വിലയായതാണ് അന്യസംസ്ഥാനത്തെ കരിമീനുകളെ വ്യാപാരികള്‍ ആശ്രയിക്കാന്‍ തുടങ്ങിയത്. മത്സ്യങ്ങള്‍ മാസങ്ങളോളം അഴുകാതിരിക്കാന്‍ വന്‍കിട വ്യാപാരികള്‍ ഫോര്‍മലിന്‍ ഉപയോഗിക്കുന്നതായി മനസിലാക്കിയതാണ് സംസ്ഥാനത്ത് പരിശോധന കഴിഞ്ഞ ദിവസങ്ങളില്‍ കര്‍ശനമാക്കിയത്.
ജില്ലയില്‍ ഫോര്‍മലിന്‍ കലര്‍ന്ന മത്സ്യങ്ങള്‍ ഇതുവരെ പരിശോധനയിലൂടെ പിടിച്ചെടുത്തിട്ടില്ല. ഇതിന്റെ പരിശോധനയ്ക്കായുള്ള കിറ്റ് ആലപ്പുഴയില്‍ ഇതുവരെ എത്തിയിട്ടില്ല. കേരളത്തില്‍ വിവിധയിടങ്ങളില്‍ പരിശോധനകളിലൂടെ ഫോര്‍മലിന്‍ സാന്നിദ്ധ്യം മത്സ്യത്തില്‍ കണ്ടെത്തിയതോടെ ജില്ലയില്‍ പകുതിയിലേറെ മീന്‍ വില്‍പ്പനയില്‍ കുറവുണ്ടായതായാണ് കണക്കുകള്‍ സൂചിപ്പിക്കുന്നത്. ജില്ലയിലെ നിലവിലെ മീന്‍വിപണിയില്‍ ചെറുമത്സ്യങ്ങള്‍ക്കാണ് പ്രിയം.
കടല്‍ ശാന്തമാകുന്ന ദിനങ്ങളില്‍ നൂറുകണക്കിന് പൊന്തുവള്ളങ്ങള്‍ ആണ് തീരത്ത് മത്സ്യബന്ധനത്തിനിറങ്ങുന്നത്. വല നിറയെ ചെറുമീനുകള്‍ ലഭിക്കുന്നതിനല്‍ വല കുടയുന്നിടത്തുതന്നെ പൂര്‍ണ്ണമായ വില്‍പ്പനയും നടക്കുന്നുണ്ട്.