അടിമാലി: കട്ടപ്പനയിലും പരിസര പ്രദേശങ്ങളിലുമായി സ്‌കൂള്‍-കോളജ് വിദ്യാര്‍ഥികള്‍ക്ക് കഞ്ചാവ് വില്‍പ്പന നടത്തിയിരുന്ന തെക്കേമുറിയില്‍ ജോസ് മോന്‍ (മുഴയന്‍ ജോസ് - 36) അടിമാലി നാര്‍കോട്ടിക് എന്‍ഫോഴ്‌സ്‌മെന്റ് സ്‌ക്വാഡ് ടീമിന്റെ പിടിയിലായി. ഇയാള്‍ കമ്പത്ത് നിന്ന് കഞ്ചാവ് വാങ്ങി കൊണ്ടുവന്ന് ചെറു പൊതികളാക്കി 500 രൂപ നിരക്കിലാണ് വില്‍പ്പന നടത്തിയിരുന്നത്. കട്ടപ്പന പഴയ ബസ്റ്റാന്റിന് സമീപത്തായുള്ള കോളനിയില്‍ കഞ്ചാവ് വില്‍പ്പനക്കിടെയാണ് ജോസ്‌മോനെ ആസൂത്രിതമായി എക്‌സൈസ് സംഘം പിടികൂടിയത്. നിരവധി ക്രിമിനല്‍ കേസുകളില്‍ പ്രതിയായ ജോസ് എക്‌സൈസ് ഉദ്യോഗസ്ഥരെ അക്രമിച്ച് രക്ഷപെടുവാന്‍ ശ്രമിച്ചിരുന്നു. 5 ഗ്രാം പായ്ക്കിന് 500 രൂപ നിരക്കിലാണ് വില്‍പ്പന നടത്തിയിരുന്നത്. എക്‌സൈസ് ഇന്‍സ്‌പെക്ടര്‍ ജി.വിജയകുമാറിന്റെ നേതൃത്വത്തില്‍ നടത്തിയ റെയ്ഡില്‍ പ്രിവന്റീവ് ഓഫീസര്‍മാരായ കെ.കെ സുരേഷ് കുമാര്‍, കെ.വി സുകു എന്നിവരും സിഇഒ മാരായ കെ.എസ് മീരാന്‍, വിനോജ് വി.ജെ, എന്‍.എന്‍ സഹദേവന്‍ പിള്ള , രഞ്ജിത് വി ദാസ് , ലിബിന്‍ രാജ്, ശരത് എന്നിവരും പങ്കെടുത്തു. പ്രതിയെ കട്ടപ്പന കോടതിയില്‍ ഹാജരാക്കി.