ശ്രീകണ്ഠപുരം: മൂന്ന് ദിവസമായി തുടരുന്ന കനത്ത മഴയില്‍ മലയോര മേഖലയില്‍ പലയിടത്തും വെള്ളപ്പൊക്കം. ചെങ്ങളായി, ശ്രീകണ്ഠപുരം, അടിച്ചേരി, മടമ്പം, കാഞ്ഞിലേരി എന്നിവിടങ്ങളില്‍ പുഴകള്‍ കരകവിഞ്ഞ് കൃഷിസ്ഥലങ്ങളില്‍ വെള്ളം കയറി. നിരവധി വാഴകളും കൃഷിയിനങ്ങളും നശിച്ചു. സംസ്ഥാനപാതയില്‍ മടമ്പത്ത് വെള്ളം കയറിയതിനാല്‍ ഗതാഗത തടസമുണ്ടായി. വാഹനങ്ങള്‍ കണിയാര്‍വയല്‍ പതിനാറാംപറമ്പ് വഴി എസ്.ഇ.എസ് കോളജ് റോഡിലൂടെ ശ്രീകണ്ഠപുരതേക്ക് തിരിച്ചുവിട്ടു. പല സ്ഥലത്തും മരങ്ങള്‍ കടപുഴകി വീണ് വൈദ്യുതി വിതരണം നിലച്ചു. ഇന്നലെ നടക്കാനിരുന്ന ഡി.വൈ.എഫ്.ഐ ബ്ലോക്ക് സമ്മേളനത്തോടനുബന്ധിച്ച പൊതുസമ്മേളനവും പ്രകടനവും ഒഴിവാക്കി. ഇന്ന് നടത്താനിരുന്ന പ്രതിമാസ സാഹിത്യതീരം ചര്‍ച്ചയും മാറ്റിവച്ചു.