ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ടോട്ടനത്തിനും ലിവര്‍പൂളിനും തോല്‍വി. കഴിഞ്ഞ ദിവസം നടന്ന മത്സരത്തില്‍ ഷെഫീല്‍ഡ് യുനൈറ്റഡിനോടാണ് ടോട്ടനം തോല്‍വി വഴങ്ങിയത്. 3-1 എന്ന സ്‌കോറിനായിരുന്നു ടോട്ടനത്തിന്റെ തോല്‍വി. 31, 69, 84 മിനുട്ടുകളിലായിരുന്നു ഷെഫീല്‍ഡ് യുനൈറ്റഡിന്റെ ഗോളുകള്‍ പിറന്നത്. 90ാം മിനുട്ടില്‍ ഹാരി കെയിനിന്റെ വകയായിരുന്നു ടോട്ടനത്തിന്റെ ആശ്വാസ ഗോള്‍. 

32 മത്സരത്തില്‍ നിന്ന് 45 പോയിന്റുമായി ടോട്ടനം ഒമ്പതാം സ്ഥാനത്താണിപ്പോള്‍. മറ്റൊരു മത്സരത്തില്‍ ഇംഗ്ലീഷ് പ്രീമിയര്‍ ലീഗ് ചാംപ്യന്‍മാരായ ലിവര്‍പൂളിനെ തരിപ്പണമാക്കിയാണ് മാഞ്ചസ്റ്റര്‍ സിറ്റി മടങ്ങിയത്. ഇത്തിഹാദ് സ്റ്റേഡിയത്തില്‍ ലിവര്‍പൂളിന് ഗാര്‍ഡ് ഓഫ് ഹോണര്‍ നല്‍കിയായിരുന്നു മത്സരം തുടങ്ങിയത്. 25ാം മിനുട്ടില്‍ കെവിന്‍ ഡിബ്രൂയിന്റെ ഗോളിലൂടെയായിരുന്നു സിറ്റി ഗോള്‍വേട്ട തുടങ്ങിയത്. സ്റ്റിര്‍ലിങ്ങിനെ ബോക്‌സില്‍ വീഴ്ത്തിയതിനായിരുന്നു സിറ്റിക്ക് പെനാല്‍റ്റി വിധിച്ചത്. 

കിക്കെടുത്ത ഡിബ്രൂയിന്‍ പന്ത് ലക്ഷ്യത്തിലെത്തിച്ചു. 35ാം മിനുട്ടില്‍ റഹീം സ്റ്റിര്‍ലിങ് രണ്ടാം ഗോളും സ്വന്തമാക്കി. ഇതോടെ ലിവര്‍പൂള്‍ പ്രധിരോധത്തിലായി. 45ാം മിനുട്ടില്‍ ഫില്‍ ഫോഡന്‍ മൂന്നാം ഗോളും നേടിയതോടെ ആദ്യ പകുതിയില്‍ തന്നെ മൂന്ന് ഗോള്‍ വഴങ്ങി തോല്‍വി മണത്തു. രണ്ടാം പകുതിക്ക് ശേഷം ഇറങ്ങിയ ലിവര്‍പൂള്‍ വീണ്ടും ഗോള്‍ വീഴാതിരിക്കാന്‍ ശക്തമായി പിടിച്ചു നിന്നു. 

എന്നാല്‍ 66ാം മിനുട്ടില്‍ സ്റ്റിര്‍ലിങ് നടത്തിയ മുന്നേറ്റം ചേമ്പര്‍ലൈന്റെ കാലില്‍ തട്ടി വലയിലെത്തുകയായിരുന്നു. ഇതോടെ 32 മത്സരത്തില്‍ നിന്ന് സിറ്റിക്ക് 66 പോയിന്റായി.   

ഇന്ന് വൈകീട്ട് അഞ്ചിന് നടക്കുന്ന മത്സരത്തില്‍ നോര്‍വിച്ച് സിറ്റി ബ്രൈറ്റണെ നേരിടും. 7.30ന് നടക്കുന്ന മത്സരത്തില്‍ ലെസ്റ്റര്‍ സിറ്റി ക്രിസ്റ്റല്‍ പാലസിനെ നേരിടും. ഇതേ സമയത്ത് നടക്കുന്ന മത്സരത്തില്‍ മാഞ്ചസ്റ്റര്‍ യുനൈറ്റഡ് ബേണ്‍മൗത്തിനെ നേരിടും. രാത്രി 10ന് നടക്കുന്ന മത്സരത്തില്‍ വോള്‍വ്‌സ് ആഴ്‌സനലിനെ നേരിടും. രാത്രി 12.30ന് ചെല്‍സിയും വാട്‌ഫോര്‍ഡും തമ്മിലാണ് മത്സരം.