തിരുവനന്തപുരം: ഒരു വര്‍ഷത്തിനുള്ളില്‍ സംസ്ഥാനത്തൊട്ടാകെ റിസോഴ്‌സ് മെറ്റീരിയല്‍ റിക്കവറി സെന്ററുകള്‍ തുടങ്ങണമെന്ന് കേന്ദ്ര കുടിവെള്ള - ശുചീകരണ സഹമന്ത്രി രമേഷ് ചന്ദപ്പ ജിഗാജിനാഗി നിര്‍ദേശിച്ചു. ഇതിനായി എല്ലാ തദ്ദേശ സ്ഥാപനങ്ങളും ഗ്രാമപഞ്ചായത്തുകളും സ്ഥലം കണ്ടെത്തണം.  ആവശ്യമായ പണം സ്വന്തം പദ്ധതി വിഹിതം, ശുചിത്വമിഷന്‍, സ്വച്ഛ് ഭാരത് മിഷന്‍ തുടങ്ങിയവയില്‍ നിന്ന് കണ്ടെത്താവുന്നതാണ്. ലോകബാങ്ക്, ശുചിത്വമിഷന്‍ എന്നിവയുടെ സംയുക്താഭിമുഖ്യത്തില്‍ തിരുവനന്തപുരത്ത് നടന്ന ഖര-ദ്രാവക മാലിന്യ സംസ്‌കരണ ദ്വിദിന ശില്‍പശാല ഉദ്ഘാടനം ചെയ്യുകയായിരുന്നു അദ്ദേഹം. ഇന്ത്യയിലെ ഏറ്റവും ശുചിത്വമുള്ള സംസ്ഥാനമായി കേരളത്തെ മാറ്റാന്‍ ലക്ഷ്യമിട്ട് നവംബര്‍ ഒന്നുമുതല്‍ പ്രചാരണം ആരംഭിക്കും. വൃത്തിയുള്ളതും ശാസ്ത്രീയവുമായ അറവുശാലകള്‍, ശ്മശാനങ്ങള്‍, കക്കൂസ് മാലിന്യ നിര്‍മാര്‍ജന പ്ലാന്റുകള്‍ തുടങ്ങിയവ സ്ഥാപിക്കുന്നതിനായിരിക്കും മുന്‍ഗണന നല്‍കുക. പൊതു സംസ്‌കരണ പ്ലാന്റിലേക്ക് ജൈവമാലിന്യങ്ങള്‍ എത്തുന്നത് പരമാവധി കുറയ്ക്കുന്നതിന് തദ്ദേശ സ്വയംഭരണ സ്ഥാപനങ്ങള്‍ നടപടി സ്വീകരിക്കണം.
ഉറവിട മാലിന്യ സംസ്‌കരണത്തിന് പ്രോത്സാഹനം നല്‍കിയും നിര്‍ബന്ധമാക്കിയും വികേന്ദ്രീകൃത മാലിന്യ സംസ്‌കരണം ഉറപ്പാക്കണമെന്നും കേന്ദ്രമന്ത്രി നിര്‍ദേശിച്ചു. സാധാരണക്കാര്‍ക്ക് പ്രാപ്യമായ രീതിയില്‍ കുറഞ്ഞ ചെലവിലുള്ള മാലിന്യ സംസ്‌കരണ യൂനിറ്റുകള്‍ യാഥാര്‍ഥ്യമാക്കുമെന്ന് യോഗത്തില്‍ തദ്ദേശസ്വയംഭരണ മന്ത്രി കെ.ടി. ജലീല്‍ അറിയിച്ചു.
ഇതിനായി പദ്ധതി വിഹിതത്തിന്റെ പത്ത് ശതമാനം വിനിയോഗിക്കാന്‍ തദ്ദേശ സ്വയംഭരണ സ്ഥാപനങ്ങള്‍ക്ക് നിര്‍ദേശം നല്‍കിയിട്ടുണ്ട്. ജൈവ, പ്ലാസ്റ്റിക് മാലിന്യങ്ങളുടെ സംസ്‌കരണത്തിന് ശാസ്ത്രീയ സംവിധാനം കൊണ്ടുവരും. സംസ്ഥാനത്ത് പുതുതായി അഞ്ച് ലക്ഷം കക്കൂസുകള്‍ നിര്‍മിക്കുമെന്നും മന്ത്രി പറഞ്ഞു.
ചീഫ് സെക്രട്ടറി എസ്.എം വിജയാനന്ദ്, കേന്ദ്ര കുടിവെള്ള ശുചിത്വ മന്ത്രാലയ സെക്രട്ടറി പരമേശ്വരയ്യര്‍, ശുചിത്വമിഷന്‍ എക്‌സിക്യൂട്ടിവ് ഡയറക്ടര്‍ ഡോ. കെ. വാസുകി തുടങ്ങിയവര്‍ സംബന്ധിച്ചു.